Microsoft-ը դադարեցրել է Windows 7օպերացիոն համակարգի տեխաջակցությունը

2009 թվականի հոկտեմբերի 22-ին թողարկված Windows 7-ի տեխնիկական աջակցությունը եւ թարմացումը երեքշաբթի օրվանից դադարեցվում է։ Այս մասին իր կայքում տեղեկացրել է Microsoft ամերիկյան ընկերությունը, փոխանցում է ՏԱՍՍ-ը։

«10 տարի հետո Windows 7-ի տեխնիկական աջակցությունը դադարեցվում է հունվարի 14-ից,- ասվում է հաղորդագրությունում։- Մենք գիտակցում ենք, որ անցումը կարող է ուղեկցվել դժվարություններով եւ ցանկանում ենք աջակցություն ցուցաբերել խորհուրդներ տալով, թե ինչ պետք է անել հետո, եւ պատասխանել տեխնիկական աջակցության դադարեցման մասին հարցերին»։

Համակարգիչները, որոնց վրա տեղադրված է Windows 7 համակարգ, կշարունակեն գործել, բայց Microsoft-ը տեխնիկական աջակցություն չի ցուցաբերի եւ թարմացումներ չի թողարկի։ Ընկերությունը խորհուրդ է տվել Windows 7-ի օգտատերերին ստեղծել ֆայլերի եւ լուսանկարների պատճեններ OneDrive ամպային սերվիսի օգնությամբ եւ օգտագործել Windows 10 օպերացիոն համակարգը։

Ինչպես նշել է Computerworld.com պորտալը՝ հղում կատարելով Net Applications ընկերության վեբ-վերլուծաբանների հետազոտությանը, Windows 7 օպերացիոն համակարգի օգտատերերի թիվը դեկտեմբերին կրճատվել է 0,2 տոկոսով նոյեմբերի համեմատ եւ տարեվերջին կազմել է անհատական համակարգիչների ընդհանուր թվի 26,6 տոկոսը։