«Ես գյուլենական եմ, ինքնաթիռը պայթեցնելու եմ». թուրքական օդանավակայանում կինը սպառնացել է պայթեցնել ինքնաթիռը (տեսանյութ)

Մի քանի օր առաջ Թուրքիայի Սաբիհա Գյոքչենի անվան օդանավակայանից դեպի Կիպրոս թռիչքի պատրաստվող ինքնաթիռում ուղևոր կանանցից մեկը ներկայացել է որպես գյուլենական շարժման անդամ և սպառնացել է պայթեցնել ինքնաթիռը: Այս մասին տեղեկացնում է haberglobal.com կայքը:

«Ես գյուլենական եմ, ինքնաթիռը պայթեցնելու եմ: Օդանավակայանում 5 ռումբ է տեղադրված»,-հայտարարել է Նիքար Դ. Անունով ուղևորուհին:

Ինքնաթիռում այդ պահին 144 ուղևոր է գտնվել:

Անվտանգության աշխատակիցների և ուղևորների ջանքերով կինը ձերբակալվել և կալանավորվել է:

Անատոլիայի հանրապետական գլխավոր դատախազությունն արդեն ավարտել է հետաքննությունը: Կազմվել է եզրակացություն՝ «օդային տրանսպորտային միջոցի առևանգման և թռիչքին խոչընդոտելու» մեղադրանքով: Նիքարին սպառնում է 5-10 տարվա ազատազրկում:

Մեղադրյալի փաստաբանը նշել է, որ իր պաշտպանյալը հոգեկան խնդիրներ ունի և գրանցված է Բաքըրքյոյի հոգեբուժարանում:

Հիշեցնենք, որ Ֆեթուլլահ Գյուլենը և նրա կողմնակիցները մեղադրվում են Թուրքիայում ռազմական հեղաշրջման փորձի համար։

2016-ի հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («FETO»`«Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, որը բնակվում է ԱՄՆ Փենսիլվանիա նահանգում: