Բացահայտվել է Երկրի վրա մահաբեր շոգի պատճառը

Կոլումբիական համալսարանի գիտնականները բացահայտել են բարձր շիթային հոսանքների եւ մահաբեր ջերմային ալիքների միջեւ կապը, որոնք միաժամանակ առաջանում են Երկրի տարբեր տարածաշրջաններում, հայտնում է Lenta-ն՝ հղում կատարելով Science Alert-ին։

Հետազոտողները վերլուծել են 1979-2018թթ․ կլիմայական տվյալները։ Նրանք պարզել են, որ երբ հյուսիսային կիսագնդի շիթային հոսքերում ձեւավորվում են որոշակի ալիքներ, 20 անգամ բարձրանում է սաստիկ շոգի վտանգը այն տարածաշրջաններում, որտեղ արտադրվում են գյուղատնտեսական մշակաբույսեր։ Այդ ալիքները, որոնք կոչվում են Ռոսբիի ալիքներ, իրենցից ներկայացնում են բարձր քամիների շեղումներ եւ բաժանվում են մի քանի տեսակի։ Երկու տեսակը՝ ալիք-5 եւ ալիք-7, առաջացնում են Հյուսիսային Ամերիկա, Եվրոպա եւ Ասիա տաք մերձարեւադարձային օդի ներհոսք։

Եթե այդ Ռոսբի ալիքները շիթային հոսքերում առկա են երկու շաբաթ կամ ավելի երկար, ապա գյուղատնտեսական մշակաբույսերի արտադրությունը կրճատվում է 4 տոկոսով կամ առավելագույնը 11 տոկոսով։

Գիտնականները գրում են, որ Ռոսբիի ալիքների չափերը հետազոտության ամբողջ ընթացքում մեծացել են հինգ անգամ, ու թեեւ դեռեւս պարզ չէ այդ երեւույթների եւ կլիմայի փոփոխության միջեւ կապը, գլոբալ տաքացումը կարող է վատացնել ջերմային ալիքների հետ կապված իրավիճակը։