Դատախազությունում համոզված են, որ Սէֆիլյանը ստեղծել եւ ղեկավարել է կազմակերպված զինված խումբ

Ժիրայր Սէֆիլյանը՝ պետությանը որոշակի գործողություններ կատարելուն հարկադրելու համար ստեղծել եւ ղեկավարել է կազմակերպված զինված խումբ: Այս մասին հաղորդագրություն է տարածել ՀՀ դատախազությունը:

Հաղորդագրության մեջ նաեւ ասվում է, որ ՀՀ հատուկ քննչական ծառայությունում քննված քրեական գործի նախաքննության ընթացքում ձեռք բերված փաստական տվյալներով հիմնավորվել է, որ Ժիրայր Սեֆիլյանը պետությանը որոշակի գործողություններ կատարելուն հարկադրելու համար զենքի գործադրմամբ քաղաքացիների եւ զինծառայողների կյանքի համար վտանգավոր բռնությամբ ՀՀ տարածքում գտնվող ռազմավարական նշանակություն ունեցող շենքեր, շինություններ զավթելու նպատակով 2015 թվականի նոյեմբերից ստեղծել եւ ղեկավարել է կազմակերպված զինված խումբ, որի կազմում գործող ենթախմբում ընդգրկվել են Սասունիկ Կիրակոսյանը, Հրայր Թոփչյանը, Հովհաննես Պետրոսյանը, Գալուստ Գրիգորյանը, Ներսես Պողոսյանը, Արթուր Մովսիսյանը եւ Սմբատ Գալոյանը: 

Դատախազության հաղորդագրությունն այսքանով չի սահմանափակվում, բայց այսքանով արդեն պարզ է, թե ինչում են մեղադրում Սեֆիլյանին: դեռ ապրիլի 2-ից առաջ էլ պարզ էր, որ եթե ամեն ինչ ընթանա իշխանությունների սցենարով, ապա Սեֆիլյանի եւ «Սասնա ծռերին» արագ մեղադրանքներ կներակայացվեն եւ կսկսվի դատական գործընթացը:

Ժիրայր Սեֆիլյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, 235-րդ հոդվածի 3-րդ մասով, 35-219-րդ հոդվածի 3-րդ մասի 1-ին կետով, զանգվածային անկարգություններ կազմակերպելու նախապատրաստության համար Գեւորգ Սաֆարյանին մեղադրանք է առաջադրվել ՀՀ քրեական օրենսգրքի 35-225-րդ հոդվածի 1-ին մասով, կազմակերպված խմբի կողմից ապօրինի կերպով հրազեն, ռազմամթերք ձեռք բերելու, պահելու, փոխադրելու համար Հրայր Թոփչյանին, Սասունիկ Կիրակոսյանին, Հովհաննես Պետրոսյանին, Գալուստ Գրիգորյանին եւ Ներսես Պողոսյանին մեղադրանքներ են ռաջադրվել ՀՀ քրեական օրենսգրքի 235-րդ հոդվածի 3-րդ մասով: