Արցախում 80% ավելացել է նռան բերքը, եւ 18,5% զբոսարշրջիկների թիվը. Պետնախարար

Գյուղատնտեսությունում կիրառվող ծրագրերի, մասնավորապես, ոռոգման ժամանակակից տեխնոլոգիաների շնորհիվ, 2018 թվականի արդյունքներով նռան բերքը ավելացել է ավելի քան 80 տոկոսով, որի գերակշիռ մասը մթերվում է հայաստանյան ընկերությունների կողմից: Այդ մասին այսօր՝ սեպտեմբերի 7-ին, մամուլի ասուլիսի ժամանակ ասաց Արցախի Հանրապետության պետական նախարար Գրիգորի Մարտիրոսյանը:

«Մի մասն էլ ուղղվում է մանրածախ վաճառքի կամ մթերում են տեղական ընկերությունները», -նշեց նա:

Գրիգորի Մարտիրոսյանը կարևորեց գյուղատնտեսության ինտենսիվ զարգացումը:

«Ինտենսիվ զարգացման տակ մենք հասկանում ենք, որ պետք է կիրառենք ագրոբիզնեսի այնպիսի մոդելներ, որոնք հնարավորինս կավելացնեն արդյունավետությունը, մասնավորապես, բերքատվությունը կամ մթերատվությունը», - ասաց նա:

Մարտիրոսյանի խոսքով՝ 2019 թվականը Արցախում զբոսաշրջության զարգացման առումով շատ հագեցած էր:

«Արդյունքում մենք ունեցանք շուրջ 18 հազար զբոսաշրջիկ առաջին կիսամյակում, խոսքը միայն արտասահմանյան զբոսաշրջիկների մասին է, որը մոտ 18,5 տոկոսով ավելին է, քան նախորդ տարվա նույն ժամանակահատվածում», - ասաց պետնախարարը:

Նրա խոսքով՝ զբասաշրջիկներն ամբողջությամբ ազատված են վիզայի պետական տուրքից , որը ոչ մեծ գումար էր կազմում՝ 3000 դրամ: