Թրամփը չի համաձայնվել G7-ի կողմից Ամազոնիայի հրդեհների մարման համար 20 մլն եվրոյի հատկացմանը. Սպիտակ տուն

ԱՄՆ նախագահ Դոնալդ Թրամփը չի համաձայնվել G7 երկրների առաջնորդների որոշման հետ՝ Ամազոնիայում անտառային հրդեհների մարման գործում որպես օգնություն 20 մլն եվրո հատկացնելու մասին: Այս մասին հայտարարել է Սպիտակ տան Ազգային անվտանգության խորհրդի ներկայացուցիչ Գարեթ Մարկին, փոխանցում է ՏԱՍՍ-ը:

«Միացյալ Նահանգները պատրաստ է օգնել այդ հրդեհների դեմ պայքարում Բրազիլիայի ջանքերին եւ չի համաձայնվել G7-ի համատեղ նախաձեռնությանը, որը հաշվի չի առել Բրազիլիայի նախագահ Ժաիր Բոլսոնարուի հետ այդ թեմայով քննարկումները»,- հայտարարությունից մեջբերում է կատարել CNN հեռուստաալիքը: «Սատարելու ավելի կառուցողական միջոց կլիներ Բրազիլիայի կառավարության հետ գործողությունների համակարգումը»,- հավելել է Մարկին:

Թրամփն ավելի վաղ հայտարարել էր, որ Բոլսոնարուն «եռանդով աշխատում է հրդեհների մարման գործում եւ բոլոր առումներով Բրազիլիայի բնակիչների համար գերազանց աշխատանք է կատարում»: Սպիտակ տան տիրոջ խոսքով՝ Բրազիլիայի նախագահը եւ նրա երկիրը «օգտվում են ԱՄՆ լիակատար աջակցությունից»:

Ըստ Բրազիլիայի տիեզերական հետազոտությունների ազգային ինստիտուտի տվյալների ՝ հունվարից օգոստոս ընկած ժամանակահատվածում հրդեհները ոչնչացրել են Ամազոնիայի անտառների ավելի քան 1,8 միլիոն հեկտարը, որոնք տեղակայված են Բրազիլիայում: Կրակի տարածման ֆոնին բրազիլական հանրության շրջանում սկսել են քննադատություններ հնչել՝ ուղղված Բոլսոնարուին եւ նրա կառավարությանը: Ընդդիմախոսների խոսքով՝ նրանք բավարար ուշադրություն չեն դարձնում շրջակա միջավայրի պահպանությանը: Իշխանություններն իրենց հերթին պնդում են, որ հրդեհների մի մասը պայմանավորված է բնական սեզոնային պատճառներով, մինչդեռ մյուս մասը դիտավորյալ հրկիզումների հետեւանք է:

G7 երկրների առաջնորդները երկուշաբթի հրդեհների չեզոքացման համար որպես օգնություն 20 մլն եվրո հատկացնելու որոշում էին ընդունել: Սակայն Բոլսոնարուի քաղաքացիական գրասենյակի ղեկավար Օնիկս Լորենցոնին հայտարարել էր, որ Բրազիլիայի իշխանությունները այդ միջոցներից կհրաժարվեն: Նրա կարծիքով՝ Բրազիլիան կարող է «ցանկացած երկրի» սովորեցնել, թե անտառներն ինչպես պահպանեն: Երեքշաբթի Բրազիլիայի նախագահը հստակեցրել էր, որ կարող էր քննարկել այդպիսի օգնության ընդունման հնարավորությունը միայն այն բանից հետո, երբ Ֆրանսիայի նախագահ Էմանուել Մակրոնը հրաժարվի իրեն ուղղած ստելու մեղադրանքներից: