Իսպանիայում «լոլիկամարտին» մասնակցել են տասնյակ հազարավոր մարդիկ (տեսանյութ)

Հազարավոր զվարճասերներ իսպանական Բունյոլ քաղաքում մասնակցել են «Տոմատինա» փառատոնին՝ միմյանց վրա լոլիկներ նետելով եւ թռչկոտելով կարմիր զանգվածի մեջ, տեղեկացնում է Reuters-ը։

10 հազար բնակչություն ունեցող Բունյոլի իշխանություններն այս տարի վաճառել են երկու անգամ ավելի շատ տոմսեր։ Այնպես որ, այնքան շատ մասնակիցներ են հավաքվել, որ նրանք հնարավորություն չեն ունեցել անգամ ինչպես հարկն է մի լավ թափ առնել լոլիկը լավ նետելու համար։

Վեց բեռնատար բերել էր մոտ 145 տոննա հասած լոլիկ։ Կազմակերպիչները դրանք մեքենաներից նետում էին հավաքվածների վրա։

Մարտի կանոններով, կարելի է նետել միայն ճզմված լոլիկներ՝ վնասվածքներից խուսափելու համար։

Որոշ փորձառու մարտիկներ աչքերը պաշտպանելու համար ակնոցներ էին դրել, բայց դրանք նույնպես այնքան էլ չէին օգնում, քանի որ ապակիներն արագ ծածկվում էին լոլիկի վարդագույն փափկամսի շիթերով։

Քաղաքի իշխանությունները շատ շենքեր պատել էին բրեզենտով, որպեսզի պահպանեն շենքերի ճակատամասերը։ Իսկ ահա այն տների պատերը, որոնք պաշտպանված չէին, մարտից հետո կարող էին դառնալ ժամանակակից նկարիչների ոգեշնչման աղբյուրներ։

Ասում են, որ «Տոմատինան» առաջ է եկել 1945 թվականին, երբ գյուղի բնակիչների միջեւ ծեծկռտուք է սկսվել։

Փառատոնն արգելվել էր որոշ ժամանակով անցած դարի 50-ականներին, գեներալ Ֆրանսիսկո Ֆրանկոյի դիկտատուրայի ժամանակ, բայց վերածնվել է 80-ական թվականներին՝ արագ հեղինակություն նվաճելով ոչ միայն Իսպանիայում, այլեւ ամբողջ աշխարհում։