Մարտի 1-ին զինծառայողներին կրակելու հրաման տրված չի եղել, սա հստակ ամրագրված է քրեական գործում, Արցախի ԶՈւ-ն որևէ գործողության չեն ներգրավվել

Ռոբերտ Քոչարյանի փաստաբանական խմբի անդամ Հայկ Ալումյանն այսօր դժվարանում է ասել, թե Մարտի 1-ի իրադարձությունների ժամանակ ինչ կլիներ, եթե ցուցարաներին ու սադրիչներին հաջողվեր ճեղքել ոստիկանական պատը և հասնել Կառավարություն։ Նա այսօր լրագրողների հետ զրույցում նշեց, որ ԶՈւ-ը կարող են մինչ արտակարգ դրություն հայտարարվելն էլ կիրառվել։

«Մի բան հստակ է՝ զինծառայողներին կրակելու հրաման տրված չի եղել, սա հստակ ամրագրված է քրեական գործում»,- ասաց նա։

Հարցին, թե ինչպես է ապացուցվում, որ մարտիմեկյան իրադարձությունների ժամանակ ցուցարաները սպառնում էին երկրի ներքին անվտանգությանը, նա ասաց, որ Սահմանադրության համաձայն՝ ՀՀ նախագահն է որոշում, թե որն է պետության համար ներքին սպառնալիք։

«Այդ օրերին շատ գործիչներ՝ այդ թվում նաև Լևոն Տեր-Պետրոսյանը, հանդես էին գալիս կարգախոսերով, թե «մենք պետք է կազմաքանդենք ներկա իշխանությունը»։ Այս կոչերը հարյուրավոր անգամ հնչել էն։ Մեծ դեր խաղաց նաև այն, որ փորձ էր արվում ԵԿՄ-ն ներգրավել, ինչպես նաև ԶՈւ-ին ներքաշել քաղաքական հարցերի մեջ։ Լուրջ աշխատանք էր տարվում, որ զինվորականներն անցնեն ցուցարարների կողմ։ Սա վտանգ չէ՞ր։ Ցուցարարներից շատերը զինված են եղել, ինչն ապացուցում էր այն, որ 100-ից ավել ոստիկան է վիրավորվել, իսկ ցուցարարները 30-ից մի քիչ ավել»,- ընդգծեց Հայկ Ալումյանը։

Հայկ Ալումյանը, խոսելով Արցախից ԶՈւ ներգրավելու մասին, շեշտեց, որ բացի ՀՀ ԶՈւ-ից որևէ այլ զինվորական այդ օրը Երևանում այդ գործողություների որևէ հատվածում ներգրավված չի եղել։ Հարցին՝ Արցախից զորք չի՞ բերվել, նա հստակ պատասխան չտվեց՝ ասելով․« Արցախի զորք չի ներգրավվել»։