«Նա պետք է ամաչի». Մակրոնն արձագանքել է Բրազիլիայի նախագահի՝ իր կնոջն ուղղված ծաղրական ակնարկին

Ֆրանսիայի նախագահ Էմանուել Մակրոնն արձագանքել է Բրազիլիայի նախագահ Ժայիր Բոլսանարույի ակնարկին, որով վերջինս սոցկայքերում ծաղրել է Ֆրանսիայի առաջին տիկնոջ արտաքինը: Մակրոնի խոսքով՝ հարավամերիկյան պետության նախագահը պետք է ամաչի նման պահվածքի համար, հաղորդում է BBC-ն:

Մեկնաբանությունների փոխանակման պատճառը Facebook սոցկայքում Ռոդրիգու Անդրեասա անունով օգտագիրոջ տեղադրած գրառումն է եղել: Մակրոնի և Բոլսոնարուի միջև ծագած վեճի ֆոնին նա սոցկայքում երկու լուսանկար է տեղադրել, որոնցից մեկում պատկերված է Բոլսոնարուն 37-ամյա կնոջ հետ, մյուսում Մակրոնը՝ 66-ամյա կնոջ՝ Բրիժիտի հետ:

«Հիմա հասկանում եք, թե ինչու է Մակրոնը հետապնդում Բոլսոնարուին»,- լուսանկարների վերնագրում գրել է Անդրեասան: «Մի՛ նվաստացրու մարդուն»,- մենկաբանել է Բոլսոնարուն` ծիծաղ արտահայտող ձայնարկությամբ:

Մակրոնը, մեկնաբանելով ակնարկները, ասել է. «Այս ամենը շատ տխուր է: Ես կարծում եմ, որ բրազիլացի կանայք ամաչել են իրենց նախագահի գրառումը կարդալիս: Բրազիլիայի պես մեծ պետության նախագահը պետք է ամաչի նման պահվածքի համար: Քանի որ շատ եմ հարգում բրազիլացիներին, մեծապես հուսով եմ, որ նրանք իրեն նորմալ դրսևորող նախագահ կունենան»:

Միջադեպի առիթով իր կարծիքն է հայտնել նաև Բրազիլիայի կրթության նախագահ Աբրահամ Վեյտրաուբը:

«Ֆրանսիան ծայրահեղությունների երկիր է… Մակրոնը պարզապես պատեհապաշտ տականք է, որը աջակցություն է փնտրում ֆրանսիական գյուղատնտեսական լոբբիից»,- գրել է նախարարը:

Հիշեցնենք, որ Էմանուել Մակրոնը «Մեծ Յոթնյակի» (G7) գագաթնաժողովին ընդառաջ առաջարկել էր օրակարգում առաջնային քննարկման դնել Բրազիլիայում գտնվող Ամազոնի խոնավ արևադարձային անտառներում ռեկորդային թվով հրդեհների հարցը:

«Ֆրանսիայի նախագահի՝ G7 ձևաչափով առանց Բրազիլիայի և տարածաշրջանի այլ երկրների մասնակցության Ամազոնյան անտառների հարցը քննարկելու առաջարկը վկայում է 21-րդ դարում տեղ չունեցող նեոգաղութատիրական մտածելակերպի մասին»,- Մակրոնի առաջարկին ի պատասխան գրել էր Բոլսոնարուն:

Ավելի ուշ արված գրառման մեջ Բրազիլիայի նախագահը մեղադրել էր Մակրոնին այն բանի համար, որ վերջինս սեփական սնափառությունից ելնելով ատելություն է հրահրում իր երկրի նկատմամբ: