Արգիշտի Քյարամյանը վարչության պետի տեղակալի պաշտոնին նշանակել է իր սանիկին. Կարո Ղուկասյան

ՀՀ ՊՎԾ պետի ժամանակավոր պաշտոնակատար Արգիշտի Քյարամյանը իր սանիկին նշանակել է վարչության պետի տեղակալի պաշտոնին։ Այս մասին այսօր՝ օգոստոսի 6-ին, NEWS.am-ի հետ զրույցում պատմեց ՊՎԾ արդեն նախկին աշխատակից Կարո Ղուկասյանը։ Նշենք, որ նա այսօր ազատվել է այդ պաշտոնից։

Ղուկասյանը պատմեց, որ գրանցված է եղել ՊՎԾ-ի տեղեկատվության եւ հասարակայնության հետ կապերի բաժնում որպես իրավախորհրդատու։

«Հետո այնպես ստացվեց, որ այդ բաժինը պետք է լուծարվեր։ Ու այդ բոլոր պարտականությունները պետք է դրվեին ՊՎԾ պետի օգնականի վրա։ Այդ ժամանակ ես գնացի գնումների բաժին, բայց դեռ գրանցված էի Տեղեկատվության եւ հասարակայնության հետ կապերի բաժնում։ Այսինքն՝ գրանցված եմ եղել այլ բաժնում, բայց աշխատել այլ բաժնում»,- պատմեց նախկին աշխատակիցը։

Նրա խոսքով՝ երբ 2 ամիս առաջ իրեն տեղեկացել են իր հաստիքի կրճատման մասին, ինքը հանդիպել է ՊՎԾ պետի պաշտոնակատարի հետ. «Ինձ ասաց՝ կվերանայենք, կքննարկենք։ Եթե հաստիքը կրճատվում է, այդ դեպքում ի՞նչ հանգամանքներում են նոր մարդ ընդունում գործի, կամ եթե կրճատվում է ինչ-որ բաժին, ապա պետք է համալրվի մեկ այլ բաժին։ Այսինքն, հաստիքը կրճատվում է, մարդիկ ազատվում են, բայց մարդիկ էլ կան, նոր են ընդունվում»։

Կարո Ղուկասյանը պատմեց, որ Արգիշտի Քյարամյանը փորձում է իր բարեկամներին նշանակել ՊՎԾ-ի ազատ հաստիքներին, սակայն ինչ-ինչ հանգամանքներում չի ստացվում. «Հիմա պետը իր ծանոթին է բերել։ Բերել, իր սանիկին է տեղավորել վարչության պետի տեղակալի պաշտոնին»։

Նշենք, որ Կարո Ղուկասյանն ամենաակտիվ հեղափոխականներից էր։ Նա «Էլեկտրիկ Երևան» շարժման խորհրդանիշը դարձած լուսանկարի հերոսն էր։