Կարիք չկա՝ ՀՀ ԱԱԾ տնօրենը գա, որ ես ու Սամվել Բաբայանը հանդիպենք. Արայիկ Հարությունյան (տեսանյութ)

Եթե պատահական դրսում որևէ մեկի հետ հանդիպում ես, դա դեռ չի նշանակում, որ պայմանավորվածություն է եղել: Այս մասին այսօր Արցախում՝ լրագրողների հետ զրույցում ասաց Արցախի նախկին պետնախարար Արայիկ Հարությունյանը՝ պատասխանելով լրագրողի հարցին, թե տեղեկություն կա, որ ՀՀ ԱԱԾ տնօրենի միջնորդությամբ իր ու Սամվել Բաբայանի միջև հանդիպում է տեղի ունեցել, ի՞նչ են պայմանավորվել:

«Որևէ պայմանավորվածություն չի եղել, եթե պատահական դուրս գանք մի քանի հոգով հանդիպենք և զրուցենք, դա չի նշանակում, որ պայմանավորվածություն է եղել: Եկեք ես իմ բոլոր հանդիպումները չներկայացնեմ հանրությանը: Կոնկրետ որևէ պայմանավորվածություն և համաձայնություն չի եղել և չի քննարկվել, մենք ի վիճակի ենք ինքնուրույն այստեղ նստենք: Դրա կարիքը չկա, որ Հայաստանի ԱԱԾ պետը գա և երկուսով նստենք:

Ես էլ հնարավորություն ունեմ Սամվել Բաբայանի հետ, Վիտալի Բալասանյանի հետ, եթե անհրաժեշտություն լինի, հանդիպել, զրուցել: Ես հաճախակի հանդիպում եմ Վիտալի Բալասանյանի հետ, Աշոտ Ղուլյանի հետ: Սամվել Բաբայանի հետ էլ վերջերս մի երկու անգամ հանդիպել ենք, զրուցել ենք: Եթե փողոցում տեսնում ենք, բարևում ենք, եթե սրճարանում ենք հանդիպում, զրուցում ենք»,-ասաց Արայիկ Հարությունյանը: Նա ասաց, որ որևէ մեկի հետ լարված հարաբերություններ չունի: