Ֆուտբոլային որոշ թիմերի անվանումները տխուր ժպիտ են առաջացնում

Ֆուտբոլի Հայաստանի առաջնության բարձրագույն եւ առաջին խմբերի առաջնություններին մասնակցում է 28 թիմ, որոնցից տասը ուժեղագույնների խմբում: Լավ է, որ մասնակից թիմերի քանակն ավելացել է, բայց մտահոգում է որոշ թիմերի անվանումները:

Անկեղծ լինենք, տպավորություն է, որ այդ թիմերի սեփականատերերը հիմա կամ ժամանակին տարօրինակ եւ զվարճալի անուններով տաքսի ծառայություններ են ունեցել: 

Իհարկե, ֆուտբոլային թիմի սեփականատիրոջ մտքով կարող է ցանկացած անվանում առաջանալ, բայց կարծում ենք, որ Հայաստանի ֆուտբոլի ֆեդերացիան, որն անցկացնում է առաջնությունները, պարտավոր է արգելել անհասկանալի, անտրամաբանական, անգամ ռաբիզ անվանումներով թիմերի մասնակցությունն առաջնությանը:

Ինչ-որ մեկին թվում է, թե ինքը խիստ հայրենասեր է եւ թիմն անվանել է «Վեստ Արմենիա»: Հիմա այս մարդուն չբացատրենք, որ դա դրսում ծիծաղ է առաջացնելու, իսկ ներսում ռաբիզի տպավորություն թողնի: Ինչ որ մեկը տեսե՞լ է Գերմանիայի առաջնության մասնակից թիմ «Օստլիխեն Պրուսիա» անվանումով: Չեք տեսել եւ չեք կարող տեսնել: Երկիրը ծիծաղի առարկա մի դարձրեք եւ քանի դեռ շատ ուշ չէ փոխեք թիմի անվանումը:

Չգտնվեց մի մարդ, որ «Բանանցի» սեփականատիրոջը բացատրի, որ թիմն անվանափոխելու կարիք չունի, որ «Բանանցը» բրենդ է: Լավ գոնե չհուշեցիք, որ թիմն «Ուրարտու» անվանելը նույնն է ինչ թշնամու ջրաղացին ջուր լցնելը: Ի՞նչ կանեիք եթե ակումբներից մեկի սեփականատերը վերցներ եւ թիմն անվաներ «Էրմանիստան» կամ «Սոմխեթի»: 

Եթե անկեղծ, ապա ավելի լավ է թիմն անվանել «Էրմանիստան» քան «Ուրարտու», քանի որ Հայաստանն Ուրարտու անվանած գիտնականները մի նպատակ են հետապնդել՝ ապացուցել, որ այն Հայաստան չէ: Օր առաջ պետք է հրաժարվել Ուրարտու անվանումից եւ դա պետք է պարտադրի հենց ֆուտբոլի ֆեդերացիան:

Կամ ի՞նչ է նշանակում Նոա անվանումը: Լավ, ինչ-ինչ պատճառներով չցանկացաք պահել «Արցախ» անունը, ապա կարելի էր այլ անուն գտնել: Դժվար է հավատալ, որ թիմն անվանափոխվել է նախկին թենիսիստ եւ փոփ-սոուլ երգիչ Յանիկ Նոայի պատվին: Իսկ եթե թիմի անվան հիմքում Նոյ նահապետն է, ապա ինչու Նոա եւ ոչ Նոյ կամ ինչ տրամաբանությամբ թիմը պետք է ստանա այս անվանումը: Նույն հաջողությամբ կարելի էր անվանել Աբրահամ, Հաբեթ, Քամ կամ Աբել: Այստեղ, հավատացեք լուրջ անելիք ունի ֆուտբոլի ֆեդերացիան: 

Ի՞նչ կմտածեն Հայաստանի եւ մեր ժողովրդի մասին արտերկրում, երբ տեսնեն, որ թիմերից մեկի անունը «Նոա» է:

Թիմերից մեկն էլ ստացել է «Լեռնային Արցախ» անվանումը: Եւ կրկին հարց՝ լավ ինչո՞ւ լեռնային; Մի՞թե հնարավոր չէ պարզապես «Արցախ»: 

«Տորպեդո» եւ «Լոկոմոտիվ» անվանումները նույնպես զարմացնում են: Նրանք ոչ միայն հայկական չեն, այլ Հայաստանի հետ որեւէ կապ չունեն: Օտարամոլության տիպիկ դրսեւորում, որը ոչ մի ձեւով չի կանխվել Հայաստանի ֆուտբոլի ֆեդերացիայի կողմից:

Այս տրամաբանությամբ մյուս մրցաշրջանում կարելի է սպասել Մարալիկի «Բեշիքթաշի», Վայքի «Բայերի», Նոյեմբերյանի «Գալաթասարայի» կամ Ստեփանավանի «Ցրվենա Զվեզդայի» մասնակցությանը մեր առաջնությանը:

Սուրեն Քալանթարյան

Top-News.am