Բաքվի «Жара» փառատոնի «հայկական» սկանդալները. ում են արգելել ելույթ ունենալ փառատոնի ժամանակ և ինչու (լուսանկարներ)

Վերջին տարիներին Ադրբեջանի մայրաքաղաքում անցկացվող «Жара» երաժշտական փառատոնը դարձել է հետխորհրդային տարածքում շոու բիզնեսի ամենաքննարկվող իրադարձություններից մեկը:

Բաքվի «Жара» փառատոնը պարբերաբար հայտնվում է ուշադրության կենտրոնում ոչ միայն աստղային հյուրերի կազմով, այլև սկանդալներով, այդ թվում՝ հայկական ծագմամբ կամ «հայերին համակրող» երգիչների ժամանման հետ կապված:

«ՌուսԱրմԻնֆո»-ն ներկայացրել է փառատոնի շրջանակում տարբեր տարիների գրանցված «հայկական» սկանդալները։

Կիրկորովի վերադարձը «սիրելի» Ադրբեջան

2016 թվականին Ռուսաստանի ժողովրդական արտիստ Ֆիլիպ Կիրկորովը 15 տարվա ընթացքում առաջին անգամ ելույթ էր ունեցել Ադրբեջանում: Մինչ այդ երգչի համերգները տարբեր պատճառաբանություններով, մասնավորապես «տեխնիկական խնդիրների» պատճառով չեղյալ էին հայտարարվում: Սակայն խոսակցություններ էին շրջանառվում, որ Ադրբեջան մուտքի արգելքը կապված է երգչի հայկական արմատների հետ։

2018 թվականին «Жара» փառատոնում Կիրկորովը հնչեցրել է այն պաշտոնյայի անունը, որը կագնած էր նրա՝ Բաքու մուտք գործելու արգելքի հետևում:

«Ես շատ եմ սիրում Ադրբեջանը։ Էմին Աղալարովի և տղաների օգնությամբ, որոնք կազմակերպել են փառատոնը, այն պատնեշը, որ գոյություն ուներ իմ և Փոլադ Բյուլբյուլօղլիի միջև, մեկընդմիշտ փլուզվեց»,- հայտնել է Կիրկորովը:

Այժմ Ֆիլիպ Կիրկորովը ոչ մի փառատոն բաց չի թողնում և ամեն տարի այցելում է Ադրբեջան։

 Հայուհի մայր ունեցող Չումակովը և վերջինիս ելույթը Բաքվում

Դեռևս 2017 թվականին փառատոնի կազմակերպիչ Էմին Աղալարովի կողմից ռուսաստանցի երգիչ Ալեքսեյ Չումակովին Բաքու հրավիրելու մասին լուրը մեծ սկանդալ էր առաջացրել Ադրբեջանում:

Սկանդալի պատճառն այն էր, որ երգիչը հայկական ծագում ունի (մայրը ծնունդով Ղարաբաղից է)։

Տեղական պարբերականները հոդվածներ էին հրապարակել Չումակովի, նրա հայկական ծագման մասին, ինչպես նաև հիշեցրել էին, որ Չումակովը շոուներից մեկի ժամանակ հայտարարել էր, որ «միայն հայերն են տիրապետում մուղամին»:

Չնայած քննադատությանը՝ Չումակովը ժամանել էր Բաքու: Ընդ որում՝ երգիչը 2019 թվականին ելույթ ունենալուց հետո արժանացել է նաև հայ երկրպագուների քննադատությանը, որոնց Ադրբեջանում նրա գտնվելը դուր չէր եկել:

 Հայկական ազգանվամբ երգչուհին՝ Բաքվում

2018 թվականին սկանդալ էր հասունացել ռուսական էստրադայի երգչուհի Զառայի մասնակցության շուրջ, որի ազգանունը Մգոյան է։

Ադրբեջանցի օգտատերերը մեծ մասամբ դատապարտել էին երգչուհու այցը Բաքու և սա բացատրել էին այն հանգամանքով, որ երգչուհին իր բոլոր համերգների ժամանակ կատարում է «Դլե յաման» հայկական երգը: Ադրբեջանցիները մտահոգություն էին հայտնել, որ նա նույն երգը կկատարի նաև փառատոնի ժամանակ, և դա «ազգային անվտանգությանն ուղղված սպառնալիք» էին որակել։

Չնայած բոլոր ռիսկերին՝ Ռուսաստանի վաստակավոր արտիստուհին ժամանել էր Ադրբեջան և ելույթ էր ունեցել փառատոնի ժամանակ:

 Սոսո Պավլիաշվիլին և Ղարաբաղը

2017 թվականին ռուսական էստրադայի վրացի երգիչ Սոսո Պավլիաշվիլիի այցը Բաքու կրկին մեծ սկանդալի պատճառ էր դարձել:

Ադրբեջանցիները նշում էին, որ երգիչն Արցախ է այցելել և այնտեղ համերգ է տվել:

Սակայն Էմին Աղալարովի ջանքերի շնորհիվ Պավլիաշվիլիին հանել էին Ադրբեջանի «սև ցուցակից», և նրան հաջողվել էր ժամանել Բաքու՝ սկզբում համերգով, իսկ հետո՝ «Жара» փառատոնին մասնակցելու:

«Այն գոռացողները, որոնք ուզում են վերադարձնել Ղարաբաղը, թող դիվերսիոն խմբեր ստեղծեն, գնան ու վերադարձնեն։ Ահա նրանք այնտեղ պառկել են բազմոցին, մտածում են՝ կգա Սոսոն, թե չէ։ Դրանից Ղարաբաղի վերադարձը կախված չէ, փառք Աստծո»,-այն ժամանակ ադրբեջանցի քննադատներին պատասխանել էր Պավլիաշվիլին։