Արմավիրի թիվ 5 հիմնական դպրոցում կրկին չեն կարողացել տնօրեն ընտրել. փոխվարչապետի համաձայնությամբ տնօրեն կնշանակի մարզպետը

Արմավիր քաղաքի թիվ 5 հիմնական դպրոցի տնօրեն այս անգամ ևս չի ընտրվել, քանի որ թեկնածուներից ոչ ոք բավարար քանակի ձայներ չի ստացել. Tert.am-ի հետ զրույցում ասաց դպրոցի ծնողական խորհրդի նախագահ Հայաստան Հակոբյանը:

Հիշեցնենք, որ դեռևս մայիսին դպրոցի աշակերտները, ծնողները և կոլեկտիվը հավաքվել էին մարզպետարանի շենքի դիմաց և պահանջում էին, որպեսզի դպրոցի տնօրենի ընտրության արդյունքները չեղյալ ճանաչվեն, և տնօրենը շարունակի մնալ Մաշա Իվանյանը, որը մայիսի 15-ին տնօրենի ընտրության ժամանակ դպրոցի կառավարման խորհրդի անդամների կողմից բավարար ձայներ չէր ստացել։

Հուլիսի 31-ին նոր մրցույթ էր հայտարարվել, որի համար, բացի գործող տնօրենից, ևս երեք թեկնածուներ հայտ էին ներկայացրել՝ փոխտնօրենները և Արմավիրի մարզի Լուկաշին համայնքի դպրոցի գործող տնօրեն Արմինե Պետրոսյանը:

Անհրաժեշտ թվով 5 ձայն թեկնածուներից որևէ մեկը չի ստացել: «Առավելագույն ձայն ստացել է նախկին տնօրենը՝ 3 ձայն, որն այս պահին ոչ էլ պաշտոնակատար է, առանց հիմքերի Արմավիրի մարզպետը նրան աշխատանքից ազատել է հունիսի 24-ին: Երկուական ձայներ հավաքել են երկու փոխտնօրենները, մնացած երեք հոգին դուրս են մնացել կրկնակի քվեարկությունից»,- ասաց նա:

Հայաստան Հակոբյանը նշեց, որ ընտրության ժամանակ վատացել է փոխքաղաքապետի հարսի ինքնազգացողությունը, որը ևս խորհրդի անդամ է:

«Քանի որ իր սկեսրայրի ասածը այս անգամ չի լսել ու ուրիշ մարդու է ձայն տվել, անմիջապես հետո վատացել է, կրկնակի քվեարկությանը չի մասնակցել, թողել տուն է գնացել, դրանից հետո երկու ուսուցիչ և ծնողներից մեկը ասել են՝ «այս ի՞նչ է կատարվում, ինչո՞ւ են խորհրդի անդամները դուրս գնում, որ այդպես է՝ մենք էլ ենք դուրս գնում» և կրկնակի քվեարկություն տեղի չի ունեցել, ինչի արդյունքում 3 հոգու գործերը 3 օրվա ընթացքում պետք է ուղարկվի փոխվարչապետին, ով էլ պետք է ընտրի տնօրենին»,- ասաց նա և նշեց, որ չգիտեն թե փոխվարչապետն ինչպես հարցը կլուծի:

«Չգիտենք, արդյոք փոխվարչապետը չի՞ կատարի մարզպետի կամքը, որովհետև մարզպետը բացահայտ ասել է, որ ինքը չի ուզում աշխատել տիկին Իվանյանի հետ, բայց գիտեք, որ մեր պայքարի արդյունքում թե՛ կոլեկտիվը, թե՛ ծնողները, և թե՛ ամբողջ համայնք, բոլորս միասին ուզում ենք, որ տիկին Իվանյանն աշխատի»,-ասաց նա:

Նշենք, որ եթե երկու անգամ չի ստացվում ընտրել դպրոցի տնօրեն, ապա ըստ կարգի՝ փոխվարչապետի համաձայնությամբ տնօրեն է նշանակում մարզպետը։