Օրենքի երեք տասնյակ կոպիտ խախտում՝ Քոչարյանին ազատությունից զրկելու համար

Ռոբերտ Քոչարյանի փաստաբաններն օրեր առաջ մի ուշագրավ փաստաթուղթ հրապարեկեցին, որից պարզ դարձավ, որ վերջին մեկ տարվա ընթացքում ՀՀ երկրորդ նախագահի դեմ իրականացվող քրեական հետապնդման վարույթն իրականացնող մարմնի, գլխավոր դատախազության եւ դատարանների կողմից թույլ է տրվել մոտ երեք տասնյակ կոպիտ խախտում:

Եւ այս խախտումներից անգամ ցանկացած մեկը կամ երկուսը բավական են, որ Հայաստանում իրավիճակի նորմալացումից հետո պատասխանատվության ենթարկվեն եւ բուն խախտում թույլ տվածները եւ նաեւ նրանք, ովքեր նրանց դրդել են իրականացնել այդ խախտումները:

Վստահաբար ամենամոտ ապագայում ստիպված են լինելու պատասխան տալ նրանք, ովքեր մեկ տարի առաջ ունենալով առաջին մեղադրանքի հիմքում ընկած նյութերը Ռոբերտ Քոչարյանին հարցաքննության է հրավիրել որպես վկա:

Իսկ ամենակարեւորն այն է, որ ՀՀ երկրորդ նախագահին մեղադրանք է առաջադրվել մի  արարքի համար, որը կատարման պահին հան­ցագործություն չի հանդիսացել: Խոսքը Սահմանադրական կարգի տապալման մասին է: Իհարկե, Ռոբերտ Քոչարյանը Սահմանադրական կարգը ոչ տապալել, ոչ էլ այդ մասին մտածել է, բայց սա արդեն բոլորովին այլ հարց է:

Շատ շուտով ոմանք ստիպված են լինելու պարզաբանել, թե ով էր իրենց այդքան շտապեցնում, որ դատարանը ստանալով կալանավորման միջնորդությունը 2018թ․ հուլիսի 26-ին ժամը 18:00-ից հետո, դատական նիստ է նշանակել նույն օրը 22:00-ին՝ հնարավորություն չտալով պաշտպաններին ծանոթանալ միջնորդությանը կից ծավալուն նյութերին: 

Խախտումները շատ են եւ աղաղակող: Խախտումները թեթեւ չեն այլ կոպիտ եւ ծանր, որոնցից վերջինն այն է, որ ընդհանուր իրավասության դատարանն ավելի քան մեկ ամիս քննության չի առել ստա­նալուց հետո անմիջապես քննության ենթակա միջնորդությունները՝ Ռոբերտ Քոչարյանի նկատմամբ խափանման այլ միջոց ընտրելու կամ գրավ կիրառելու վերաբերյալ:

ՀՀ երկրորդ նախագահ, բնականաբար, կրկին ազատության մեջ կլինի, բայց բոլոր նրանք, ովքեր սեփական նախաձեռնությամբ կամ այլոց դրդմամբ արել են այս հակաօրինական գործողությունները ստիպված են լինելու պատասխանել բազմաթիվ հարցերի, որոնք նրանց տալու են ոչ լրագրողները:

Հակոբ Ասատրյան

Top-News.am