Քոչարյանը բազմաթիվ հանդիպումներ է ունեցել արտախորհրդարանական ուժերի հետ. Վիկտոր Սողոմոնյանը՝ նրա վարկանիշի մասին

ՀՀ երկրորդ նախագահ Ռոբերտ Քոչարյանը բազմաթիվ հանդիպումներ է ունեցել արտախորհրդարանական ուժերի ներկայացուցիչների հետ, հանդիպումներ չեն եղել խորհրդարանական ուժերի ներկայացուցիչների հետ: Այս մասին, այսօր՝ հուլիսի 29-ին, լրագրողների հետ հանդիպման ժամանակ նշեց ՀՀ երկրորդ նախագահի գրասենյակի ղեկավար Վիկտոր Սողոմոնյանը:

Նա նշեց, որ ծանոթացել է այդ հարցումների կոնֆիդենցիալ տվյալներին եւ կարող է ասել, որ իրենց համար կանխատեսելի պատկեր կա. «Մենք մեկ տարի առաջ կանխատեսում էինք, որ այս գործընթացների արդյունքում այն կեղծիքը, որ կա նախագահ Քոչարյանի հետ կապված ՝ արյունը, միլիարդները, դուրս է եկել, եւ հիմա կտրուկ փոփոխություն ունենք: ես չեմ կասկածում, որ այդ փոփոխությունը շարունակվելու է: Նախագահ Քոչարյանի դրական ժառանգությունը չենք կարող փոխել: Քոչարյանը պատմության մեջ կմնա առանց այն սին մեղադրանքների, որոնք կային մինչեւ հիմա»,-ասաց նա:

Անդրադառնալով, Ռոբերտ Քոչարյանի վերջին հարցազրույցի ժամանակ հնչեցրած «քաղաքական կոնսենսուս մինուս մեկ» արտահայտությանը, Սողոմոնյանն ընդգծեց. «Մենք ունենք շատ բարդ վիճակ, երբ իշխանությունը պատկանում է մեկ մարդու եւ այդ մարդը հավասարակշռված որոշումներ կայացնելուց շատ հեռու է: Այդ մարդը առաջնորդվում է իր ներքին հասկացություններով, որոնք հաճախ շատ պրիմիտիվ են: Այդ մարդը որեւէ կոնսոլիդացիոն ֆորմատի մեջ չի տեղավորվում, բոլորը թշնամի են, բոլորին պետք է պառկացնել ասֆալտին: Ես չեմ կասկածում, որ այդ «կոնսենսուս մինուս մեկ» բանաձեւը ձեւավորվել է բնական ճանապարհով: Պարզ է, որ մեկ մարդ այսօր սեփականաշնորհել է պետությունը՝ ասելով որ դա ժողովուրդն է արել: Դասական պոպուլիզմի դրսևորում ունենք Հայաստանում, մենք ոչ առաջինն ենք, ոչ վերջինն եք: Դրա դեղամիջոցը հենց այդ բանաձեւն է: Այդ մարդը փորձում է միանձնյա կառավարել երկիրը»,-հայտարարեց Սողոմոնյանը:

Նա նաեւ անդրադարձավ իշխանությունների տված խոստումներին եւ հասարակության ակնկալիքներին.«Դուք չեք խոստացել, որ թոշակները 4-5 հազարով կավելանա, չեք խոստացել 0,11 տոկոս տնտեսական աճ, դուք ասել եք՝ ես կախարդական փայտիկ ունեմ, 20 րոպեում ձեր հարցերը լուծելու եմ: մարդիկ ինչ լսել են, դրան էլ սպասում են»: