ԲԴԽ-ն բավարարել է Դ.Գրիգորյանի նկատմամբ քրեական հետապնդում սկսելու թույլտվության վերաբերյալ միջնորդությունը

Բարձրագույն դատական խորհուրդը երկու դրվագով բավարարել է Դատախազության միջնորդությունը, իսկ մեկով՝ մերժել։ Այս մասին տեղեկանում ենք Բարձրագույն դատական խորհրդի տարածած պաշտոնական հաղորդագրությունից։

Նշենք, որ հուլիսի 26-ին Դատախազությունը միջնորդություն էր ներկայացրել ԲԴԽ Դավիթ Գրիգորյանի նկատմամբ քրեական հետապնդում սկսելու թույլտվության վերաբերյալ։ Հաղորդագրությունում մասնավորապես ասված է.

«Սույն թվականի հուլիսի 26-ին ՀՀ գլխավոր դատախազի պաշտոնակատարի կողմից Բարձրագույն դատական խորհուրդ է ներկայացվել միջնորդություն՝ երեք դրվագով Հայաստանի Հանրապետության քրեական օրենսգրքի 314 հոդվածի 1-ին մասի (պաշտոնեական կեղծիք) հատկանիշներով քննվող քրեական գործով դատավոր Դավիթ Գրիգորյանի նկատմամբ քրեական հետապնդում հարուցելու համաձայնություն տալու մասին։ Բարձրագույն դատական խորհուրդը, 2019 թվականի հուլիսի 26-ին քննելով միջնորդությունը, լսելով ինչպես ՀՀ գլխավոր դատախազի տեղակալ Է Հարությունյանին, այնպես էլ դատավոր Դ․ Գրիգորյանին, որոշել է ներկայացված միջնորդությունը երկու դրվագներով բավարարել, իսկ մեկով՝ մերժել։

Որոշումը հրապարակվել է 2019թ. հուլիսի 27-ին։ Ելնելով վերոգրյալից՝ օրենքի ուժով կասեցվել են նաև դատավոր Դավիթ Գրիգորյանի լիազորությունները»։

Ավելի վաղ «Փաստինֆո»-ն զրուցել էր ԲԴԽ անդամ Գրիգոր Բեքմեզյանի հետ՝ հարցնելով արդյո՞ք այսօր ԲԴԽ-ն կանգնած է դատավորների կողքին։ Նշենք, որ ԱԺ-ում ԲԴԽ անդամ ընտրվելու ժամանակ նա նմանատիպ հայտարարությամբ էր հանդես եկել, որ դատավորները նեղսրտում են՝ ԲԴԽ-ն իրենց կողքին կանգնած չէ։ ԲԴԽ անդամը մեր հարցին ի պատասխան ասաց. «Այո։ Կցանկանամ, որ այս գործը չկապենք իմ ասածի հետ, որովհետև դրանք տարբեր բաներ են», - ասաց Գրիգոր Բեքմեզյանը