ՌԴ արտագաղթող հայերի թվի կտրուկ աճում մտահոգվելու ոչինչ չեմ տեսնում. ԱՍՀՆ ժողովրդագրության բաժնի պետ

Ռուսաստան արտագաղթող հայերի թվի կտրուկ աճում մտահոգվելու ոչինչ չեմ տեսնում. պարզապես մուտքի և ելքի ցուցանիշ է: Սրանք ոչ թե մշտական, այլ աշխատանքային միգրացիայի թվերն են: Այս մասին Tert.am-ի հետ զրույցում ասաց Աշխատանքի և սոցիալական հարցերի նախարարության ժողովրդագրության բաժնի պետ Արտակ Մարկոսյանը:

«Կարող է՝ և մարդիկ են շատ գնացել, ժամանակավոր աշխատանքային միգրացիայի շրջանն է, հնարավոր է՝ այս տարի մի քիչ շատ են մեկնել, բայց դա էլ 100 տոկոսով չենք կարող ասել: Պարզապես մուտքի և ելքի տվյալներ են, արտառոց բան չկա: Տարվա վերջում կարող է նաև կտրուկ իջնել»,- նշեց Արտակ Մարկոսյանը:

Նշենք, որ «Известия» պարբերականը՝ հղում անելով Գայդարի անվան տնտեսական քաղաքականության ինստիտուտի հետազոտությանը, գրել էր, որ 2019թ.-ի հունվար-ապրիլ ամիսներին Ռուսաստանի Դաշնության բնակչության միգրացիոն աճը կտրուկ ավելացել է՝ գերազանցելով վերջին տասնամյակի բոլոր ցուցանիշները: Ամենից շատ ավելացել է Հայաստանից և Ուկրաինայից ներգաղթյալների թիվը: 2019թ.-ի հունվարից ապրիլն ընկած ժամանակահատվածում Հայաստանից Ռուսաստան է մեկնել 12 800 մարդ՝ 2018թ.-ի 4900-ի համեմատ: Ընթացիկ տարվա հունիսի 1-ի դրությամբ Ռուսաստան է ժամանել Հայաստանի 49 000 քաղաքացի:

Արտակ Մարկոսյանի խոսքով` ավելի թարմ՝ մայիս ամսվա տվյալներով ևս Հայաստանից կա աճ՝ 16.183՝ նախորդ տարվա 6.893-ի համեմատ:

Ժողովրդագրության բաժնի պետը միգրացիայի աճը նաև պայմանավորում է Ռուսաստանում հաշվարկի մեթոդաբանության փոփոխության հետ. «Հնարավոր է՝ ոչ մի բան չի փոխվել, կարող է՝ նույնն են թվերը, ուղղակի մեթոդաբանությունն է փոխվել»:

«Մեր տվյալներով՝ առաջին եռամսյակում ընդհանրապես հայկական անձնագրերով մուտքն ու ելքը դրական է եղել՝ 2526: Դա առաջին դեպքն է 2011 թ.-ից սկսած: 2011 թ.-ից մինչև այս տարի հայկական անձնագրերով թե՛ եռամսյակային, թե՛ կիսամյակային, թե՛ տարեկան կտրվածքով մուտքերն ու ելքերը բացասական են եղել: Այս տարի առաջին եռամսյակում մենք դրական ցուցանիշ ունենք»,- հայտնեց Արտակ Մարկոսյանը: