Չի բացառվում, որ Բաղրամյան 26-ի սկանդալային հոլովակը տեսագրվել է, երբ այն հանդիսանում էր ՀՀ վարչապետի նստավայրը (տեսանյութ)

Նախագահականից բացառում են, որ համացանցում տարածված հոլովակը, որտեղ աղջիկները «զբոսանքի են գնացել» Բաղրամյան 26, տեղի է ունեցել այն ժամանակ, երբ այդ շենքում էր ՀՀ նախագահ Արմեն Սարգսյանը:

Նշենք, որ աղջիկների Բաղրամյան 26-ում հայտնվելու հետ կապված շրջանառվում է նաև «Իմ քայլը» խմբակցության պատգամավոր Հայկ Սարգսյանի անունը, ով՝ ըստ մամուլում տարածված տեղեկությունների, նրանց ուղեկիցն է եղել:

«Հանրապետության նախագահի աշխատակազմը Բաղրամյան 26 հասցեում (ներկայումս՝ Բաղրամյան 26/1) գտնվող վարչական շենք տեղափոխվել է այս տարվա մարտից, շենք ելքն ու մուտքն իրականացվում է նախագահի աշխատակազմի ղեկավարի և Պետական պահպանության ծառայության պետի «Հանրապետության նախագահի աշխատակազմի անցագրային և ներքին ռեժիմը հաստատելու մասին» հրամանի համաձայն»,-«Փաստինֆո»-ի հետ զրույցում ասաց ՀՀ նախագահի հասարակայնության հետ կապերի վարչության պետ Զոյա Բարսեղյանը:

Նա նշեց, որ այս ընթացքում տեսանյութում պատկերված անձանց մուտք նախագահական նստավայր չի եղել և բացառվում է, որ նախագահի աշխատակազմը նստավայրի շենքում նման բան թույլատրի:

Նշենք, որ 2018թ.-ի նոյեմբերի 22-ին Ազգային ժողովն ընդունել էր օրինագիծ , որի համաձայն՝ Հայաստանի նախագահի նստավայրը Մաշտոցի 47 հասցեից տեղափոխվում է Բաղրամյան 26, իսկ վարչապետի նստավայրը՝ Բաղրամյան 26-ից Հանրապետության հրապարակ, Կառավարական տուն 1:

Ուստի, եթե հիմք ընդունենք նախագահականից տրված տեղեկատվությունը, ապա ստացվում է, որ վերոնշյալ հոլովակը արվել է այն ժամանակ, երբ Բաղրամյան 26-ը վարչապետի նստավայրն էր եւ այնտեղ հիմնականում իր գործունեությունն էր ծավալում վարչապետի տիկինը։