Կադիրովը վրացի լրագրողին «ոչնչություն եւ սրիկա» է անվանել

Չեչնիայի ղեկավար Ռամզան Կադիրովը ՌԴ նախագահ Վլադիմիր Պուտինին վիրավորած վրացի հաղորդավար Գեորգի Գաբունիային «ոչնչություն եւ սրիկա» է անվանել, հաղորդում է «Լենտա»-ն:

Այս մասին նա գրել է Telegram-ի իր ալիքում:

«Նա ո՛չ Կովկասի զավակ է, ո՛չ տղամարդ, ո՛չ էլ լեռնաբնակ: Գաբունիան վախկոտ է եւ անսեռ էակ: Դա ամոթ է Վրաստանի եւ նրա ժողովրդի համար»,- գրել է Կադիրովը:

Նրա կարծիքով՝ տեղի ունեցածը ոչ թե լրագրողի անձնական նախաձեռնությունն է, այլ հեռուստաալիքի կամ ինչ-որ շահագրգիռ անձանց ծրագրված քայլը:

«Այլապես Գաբունիային կանջատեին ուղիղ եթերից հենց առաջին վայրկյանից»,- բացատրել է նա:

Կադիրովը կարծում է, որ Պուտինի հետ միասին հաղորդավարը վիրավորել է նաեւ ռուս ժողովրդին: Նրա խոսքով՝ Վրաստանի նախագահն ու վարչապետը պետք է հրապարակայնորեն ներողություն խնդրեն, իսկ հաղորդավարի դեմ քրեական գործ հարուցեն:

«Այլապես 3 օրից պետք է փակել Վրաստան տանող բոլոր ճանապարհները: Գաբունիային պետք է թաքցնել, քանի որ նրան առաջին իսկ հանդիպած մարդը նրա հետ կանի այն, ինչին նա արժանի»,- եզրափակել է Կադիրովը:

Հիշեցնենք, որ կիրակի երեկոյան հեռուստահաղորդավար Գեորգի Գաբունիան «Ռուսթավի 2»-ում իր «P.S.» հեղինակային ծրագիրը սկսել էր ՌԴ նախագահ Վլադիմիր Պուտինին ուղղված հայհոյանքով: Վրաստանում համացանցի ահռելի թվով օգտատերեր դատապարտել են Գաբունիային եւ մտավախություն հայտնել, որ վրաց-ռուսական հարաբերությունները կարող են է՛լ ավելի սրվել: Հեռուստաընկերության գլխավոր տնօրեն Նիկա Գվարամիան հայտարարել է, որ ուղիղ եթերում հայհոյանքն անընդունելի է համարում, չնայած եւ համաձայն է հեռուստահաղորդավարի դիրքորոշմանը: Գաբունիայի ելույթը դատապարտել են Վրաստանի նախագահն ու վարչապետը, երկրի ԱԳՆ-ն լրագրողի ելույթը գնահատել է որպես երկրների հարաբերություններում լարվածությոն մտցնելու փորձ:

Ռուսաստանի ԱԳՆ պաշտոնական ներկայացուցիչ Մարիա Զախարովան արձագանքել է միջադեպին եւ շեշտել, որ սա «Վրաստանի դժբախտությունն է»: