Անձամբ ես կհատուցեմ 650 000 դրամը․ Ալումյանը՝ դատական ծախսը փոխհատուցելու Փաշինյանի պահանջի մասին. (տեսանյութ)

Ռոբերտ Քոչարյանի պաշտպանները հայտարարում են, թե գործադիր իշխանությունը դատարանների նկատմամբ աննախադեպ ճնշումներ է գործադրում։ Մինչդեռ, կա հակառակ պնդումը, որ ճնշում կա նաև Քոչարյանի կողմից, օրինակ՝ երբ նա դատավորին կոչ արեց գործից «յախա թափել»։

Մամուլի ասուլիսի ընթացքում Ռոբերտ Քոչարյանի պաշտպան, փաստաբան Հայկ Ալումյանը մեկնաբանեց այս պնդումը՝ ասելով, որ դատարանների նկատմամբ ճնշումները «միջնադարյան» դրսևումներ են ստանում․ «Այն, որ դատավորը նշանակված է եղել Ռոբերտ Քոչարյանի կողմից, դա նրան էսօր որևէ լծակ չի տալիս դատավորի նկատմամբ։ Էսօր նայեք՝ ո՞վ լծակ ունի դատավորի նկատմամբ։ Կան լսող դատավորներ, որոնք լսում են տվյալ պահի իշխանություններին»։

Ալումյանն անդրադարձավ նաև վարչապետ Նիկոլ Փաշինյանի դեմ Ռոբերտ Քոչարյանի ներկայացրած դատական հայցին։ Հիշեցրեց՝ Քոչարյանին ազատելուց հետո Նիկոլ Փաշինյանը Փարիզում մի արտահայտություն էր արել․ «Կամ թեկուզ Ռոբերտ Քոչարյանին ազատ արձակելու մեկնաբանությունը, ասում է՝ անձեռնմխելի է, ինչ է նշանակում անձեռնմխելի, այսինքն՝ կարելի է մարդկանց սպանությունը կազմակերպել ու ասել՝ ես անձեռնմխելի եմ, այդ որտե՞ղ է այդպես գրված։ Յուրաքանչյուրին է պարզ, որ այս արտահայտությունը վերաբերվում է Ռոբերտ Քոչարյանին։ Բնականաբար, պարոն Քոչարյանը պարոն Փաշինյանին դատի տվեց։ Դատարանում մյուս կողմը ներկայացրեց պատասխան, թե այս արտահայտությունն անելով՝ պարոն Փաշինյանը պարոն Քոչարյանին նկատի չի ունեցել։ Մենք ակնկալում էինք, որ կհերքվի այս արտահայտությունը և ներողություն կհայցի արտահայտություն անողը։ Փաստորեն, պարոն Փաշինյանը հերքեց, որ պարոն Քոչարյանը կապ ունի որևէ սպանության հետ»։

Հայկ Ալումյանը անդրադարձավ նաև հանգամանքին, որ Նիկոլ Փաշինյանը Քոչարյանից պահանջել է փոխհատուցել դատական ծախսերը․ «Անձամբ ես կհատուցեմ 650 000 դրամը, 10% էլ ավել կփոխանցեմ, եթե դատարանն այդպես որոշի»։