Ոստիկանը խայտառակվել է շանն անվանելով Երրորդ ռեյխի գեներալի պատվին

Ամերիկացի ոստիկանը պատահաբար անվանել է շանը նացիստական գեներալի պատվին եւ զայրացրել սոցիալական ցանցերի օգտատերերին: Ռոմել անունով շան մասին գրառումը հայտնվել էր Լեյք շրջանի (Ֆլորիդա նահանգ) ոստիկանական տեղամասի թվիթերյան էջում, հաղորդում է Լենտա.Ռու-ն:

Ոստիկանները հրապարակել էին երեք ամսական շան նկարներն ու գրել, որ շուտով շունը կսկի վարժվել կինոլոգի մոտ: Շունը հետագայում կկարողանա որոնել կորած մարդկանց, փախուստի դիմած բանտարկյալներին եւ տարբեր ապացույցներ: «Բարի գալուստ, Ռոմել»,-ոստիկաններն ամփոփել էին գրառումը:

Օգտատերերը նկատել էին, որ շան անունը համընկնում է գերմանացի գեներալ-ֆելդմարշալ Էրվին Ռոմելի ազգանվան հետ, որն Օսի զորքերի հրամանատարն էր Հյուսիսաֆրիկյան արշավի ժամանակ: «Ահա ինչ է տեղի ունենում, երբ ժողովուրդը պատմություն չի սովորում: Լավագույն գաղափարը չէր անվանել ոստիկանական շներին վերմախտի գեներալների պատվին»,-քննադատել է օգտատեր Գլեն Սթիվենսը (Glenn Stevens): «Ինչպիսի ուշագրավ համընկնում.ոՈստիկաններն անվանում են շանը նացիստների պատվին»,-հեգնել է մեկ այլ օգտատեր Bernie Bird Truther-ը: «Ինչո՞ւ պարզապես չանվանել նրան Հիտլեր»,-շարունակել է Tony D-ն:

Ոստիկաններն ականջալուր են եղել քննադատություններին եւ մի քանի ժամ անց գրել, որ շունն այժմ կրում է Սքաութ անունը: Նրանք հավելել են, որ շան տերն անվանել էր նրան իր առաջին շան պատվին եւ ոչինչ չգիտեր նացիստ Ռոմելի մասին:

Էրվին Ռոմելը Երրորդ ռեյխի ամենահայտնի գեներալներից մեկն էր: Նա մի քանի տարի շարունակ զսպում էր Հյուսիսային Աֆրիկայում հարձակումները, որի համար ստացել էր «Անապատի աղվես» մականունը: 1944 թվականին նա մեղադրվել էր Հիտլերի վրա մահափորձ կատարելու մեջ, որի հետեւանքով գործել էր ինքնասպանություն: