Ավստրալիայում հավելված են ստեղծել, որը կօգնի ցանկացած քաղաքում կայանատեղի գտնել

Ավստրալիայի Չարլզ Սթերտի անվան միջտարածաշրջանային համալսարանի հետազոտողների խումբը գիտությանը օգնության է կանչել ավտոսիրողներին եւ նոր բջջային հավելված մշակել, որը վարորդներին կօգնի կատարյալ կայանատեղի գտնել՝ ազատ եւ որքան հնարավոր է մոտ անհրաժեշտ վայրին, գրում է Port Macquarie News-ը:

Սաբիհ Ռեմանի գլխավորությամբ հետազոտական խումբը բջջային հեռախոսի համար սկզբունքորեն նոր հավելված է մշակել, որը կօգնի վարորդներին կատարյալ կայանատեղի գտնել՝ դինամիկ տվյալներն օգտագործելով յուրաքանչյուր կայանատեղիում ցանկացած ժամին ազատ տեղերի առկայությունը կանխատեսելու համար:

«Մեր հավելվածը շատ հետաքրքիր կլինի բոլոր ավտոսիրողներին: Օրինակ, եթե դուք գործուղման ժամանակ եկել եք ինչ-որ քաղաք եւ պետք է կարեւոր գործնական հանդիպման գնաք, ինչպե՞ս կայանատեղի գտնել: Այս հավելվածի օգտագործմամբ՝ շատ պարզ, ձեր փոխարեն ամեն ինչ կանեն ալգորիթմները, որոնք կարող են կայանատեղի գտնել եւ 75-80 տոկոս ճշգրտությամբ գնահատել ազատ տեղի առկայությունը ձեր ժամանման պահին», - պատմում է դոկտոր Ռեմանը:

Ռեմանի խոսքով՝ իր խմբի մշակած ծրագիրը զարմանալի կերպով տարբերվում է գոյություն ունեցող բազմաթիվ ինտելեկտուալ կայանատեղային համակարգերից, որոնք օրինակ կիրառվում են առեւտրային կենտրոնների կայանատեղիներում եւ պարզապես հաշվում են ազատ տեղերի քանակը:

«Մեր համակարգի հիմնական առանձնահատկությունն այն է, որ այն կարող է օգտագործվել օրվա ցանկացած պահի եւ ցանկացած քաղաքում: Այս տեխնոլոգիան, սովորելու իր ունակության շնորհիվ, կարծես կարողանում է տեսնել ապագան, եւ դուք կարող եք վստահ լինել, որ երբ ձեր մեքենան հասնի մոտակա կայանատեղիին, այնտեղ ազատ տեղ կլինի», - հավելել է նա: