Կանադայում «Արցախի ժողովրդի խորհրդարանական բարեկամներ» խումբ է ստեղծվել

Արցախի Հանրապետության Ազգային ժողովի նախագահ Աշոտ Ղուլյանը մարտի 22-ին շնորհակալական նամակ է ուղարկել Կանադայի Համայնքների պալատի անդամ Ռեյչել Հարդերին, ում ղեկավարությամբ մարտի 19-ին Օտտավայում Արցախի ժողովրդի հետ խորհրդարանական բարեկամների խումբ է ձեւավորվել:

Արցախի ԱԺ-ից NEWS.am-ին հայտնում են, որ նամակում մասնավորապես ասված է. «Հարգելի տիկին Հարդեր, Արցախի Հանրապետության Ազգային ժողովի եւ իմ անունից երախտագիտություն եմ հայտնում Ձեզ եւ խմբի անդամներին՝ Արցախի ժողովրդի հետ բարեկամական հարաբերություններ զարգացնելու ցանկության ու վճռականության համար:

Այս նախաձեռնությունն ինստիտուցիոնալ նոր մակարդակ է մեր համագործակցության, որը սկսվել է երկու տարի առաջ՝ Ստեփանակերտ կատարած Ձեր այցով եւ մեր երկրի հետ ծանոթությամբ:

Համոզված եմ, որ այն արդյունավետ հարթակ կդառնան Արցախի եւ Կանադայի միջեւ փոխշահավետ կապերի ընդլայնման համար, մասնավորապես՝ մարդասիրական համագործակցության բնագավառում»։

Ազգային ժողովի նախագահը շնորհակալական նամակ է ուղարկել նաեւ Կանադայի Հայ դատի հանձնախմբի գործադիր տնօրեն Աեւակ Բելյանին՝ բարեկամության խմբի ձեւավորման գործին ցուցաբերած օժանդակության համար։