Հղի կնոջ ծխելը մեծացնում է երեխայի հանկարծամահության հավանականությունը

Հղի կնոջ կողմից օրական թեկուզ մեկ ծխախոտ ծխելը մեծացնում երեխայի կյանքի առաջին տարում չպարզված պատճառներով մանկական հանկարծամահության հավանականությունը: Այս մասին նշված է Pediatrics ամսագրում հրապարակված հետազոտության մեջ:

Սիեթլի Մանկաբուժության ինստիտուտից (ԱՄՆ) Տատյանա Անդերսոնը կարեւորում է ծխելուց մոր հրաժարվելը վաղ մանկական մահացության մակարդակի նվազեցման նպատակով: Անդերսոնը եւ նրա գործընկերները հետազոտության շրջանակում Microsoft-ի արհեստական ինտելեկտի միջոցով վերլուծել են ԱՄՆ ծննդատների տրամադրած տվյալները: Ընդհանուր առմամբ, խոսքը ծննդկանների 20 միլիոնից ավելի հիվանդությունների պատմությունների եւ 2007-2011 թվականներին մանկական հանկարծամահության 19 հազար դեպքերի մասին է:

Պարզվել է, որ ծխելը երեխաների շրջանում հանկարծամահության զարգացման ռիսկի լուրջ գործոն է: Ընդ որում՝ մահվան հավանականությունը 2 անգամ մեծացել է, եթե կինը օրական նույնիսկ մեկ ծխախոտից ավելի չի ծխել: Իսկ եթե խոսքը վերաբերում էր ծխախոտի ամենօրյա տուփին, ապա երեխայի հանկարծամահության հավանականությունը մեծանում էր մինչեւ 295 տոկոս: Հղիանալուն նախորդող ժամանակահատվածում ծխելուց հրաժարվելու դեպքում այդ հավանականությունը մեծանում էր միայն 1,5 անգամ:

Ստացած տվյալների հետ կապված՝ գիտնականները կոչ են անում ուժեղացնել հղի կանանց շրջանում ծխելու դեմ պայքարի միջոցառումները, քանի որ միայն ԱՄՆ-ում ծխախոտից հրաժարվելը թույլ կտար երեխաների շրջանում հանկարծամահության մակարդակը 22 տոկոսով նվազեցնել: