Ռուս կանայք դարձել են Chanel-ի նկարահանման գլխավոր հերոսուհիները

Chanel ֆրանսիական նորաձեւության տունը ռուս երեք կանանց հրավիրել է մասնակցելու ոսկերչական զարդերի նոր հավաքածուին նվիրված գովազդային արշավին: Գովազդային հոլովակները հայտնվել են You-Tube-ում:

Նկարահանմանը մասնակցել են Մեծ թատրոնի բալետի առաջատար պարուհի Եկատերինա Շիպուլինան, պետերբուրգցի նկարչուհի Մարիա Յանկովսկին եւ դաջվածքների վարպետ Սաշա Unisex-ը: Կանայք ցուցադրել են Coco Crush շարքը, որում տեղ են գտել թեւնոցներ, մատանիներ, ականջօղեր եւ մանյակներ՝ թանկարժեք քարերով զարդարված դեղին ու սպիտակ ոսկուց:

Առաջին հոլովակում երեւում է, թե ինչպես է զարդերով երաժշտության տակ պարում Եկատերինա Շիպուլինան, երկրորդում՝ Մարիա Յանկովսկին նկարում սեփական դիմանկարը, իսկ երրորդում՝ Սաշա Unisex-ն աշխատում իր սրահում: Հավաքածուն ներկայացվելու է մոսկովյան Aizel բուտիկում, որի հետ Chanel-ը համագործակցում է արդեն երրորդ անգամ:

Chanel նորաձեւության տունը Գաբրիել (Կոկո) Շանելի կողմից հիմնադրվել է Ֆրանսիայում 1909 թվականին: Առաջին խանութը նա բացել է 1910 թվականին Փարիզում: Սկզբում նորաձեւության տունն արտադրում էր միայն հագուստ եւ աքսեսուարներ, այնուհետեւ սկսել է թողարկել պարֆյումերիա, զարդեր եւ ժամացույցներ:

1921 թվականին Շանելը պարֆյումեր Էռնեստ Բոյի հետ միասին թողարկել է մակնիշի առաջին բույրը՝ Chanel 5-ը:

1924 թվականին ձեռնարկատեր Պիեռ Վերտեյմերի հետ համատեղ դիզայները հիմնել է ընկերության պարֆյումերային ստորաբաժանումը՝ Parfums Chanel-ը, որը ներկայում զբաղվում է նաեւ կոսմետիկայի արտադրությամբ: Parfums Chanel-ի գովազդային արշավներին մասնակցել են կինոաստղեր Մերիլին Մոնրոն, Քեթրին Դենյովը, Կիրա Նայթլին, Նիկոլ Քիդմանը, Կարոլ Բուքեն, Օդրի Տոտուն: