Թրամփը 20 մլն դոլար է պահանջել Մոսկվայում կառուցվող երկնաքերին իր անունը տալու թույլտվության համար

ԱՄՆ նախագահ Դոնալդ Թրամփը 2006 թվականին 20 մլն դոլար է պահանջել ուկրաինացի գործարարից երկնաքերին, որն այն ժամանակ նախատեսվում էր կառուցել Մոսկվայում, Trump Tower անունը տալու թույլտվության համար: Այդ մասին հայտարարել է ինքը` գործարար Պավել Ֆուկսը` Bloomberg-ին տված հարցազրույցում, հաղորդում է ТАСС-ը:

Ֆուկսը նշել է, որ 2006-ին Մոսկվայում հանդիպել է Թրամփի դստեր` Իվանկայի, և որդու` Դոնալդի հետ` քննարկելու երկնաքերի կառուցման ծրագիրը, որն, ի վերջո, այդպես էլ չի իրականացվել:

Գործարարը շեշտել է, որ 2005 թվականին ինքն այդ հարցը մի քանի անգամ քննարկել է նաև Թրամփի հետ` Նյու Յորքում և Ֆլորիդայում:

Ֆուկսի խոսքով` ինքը Թրամփին առաջարկել է վճարել 10 մլն դոլար, որպեսզի թույլ տա երկնաքերն անվանել Trump Tower: Թրամփը, սակայն, պահանջել է 20 մլն դոլար` նշելով, որ դա մեծ գումար չէ:

«Ես ասացի` ոչ, դա մեծ գումար է… Եվ այդպես էլ մենք համաձայնության չեկանք»,- պատմել է գործարարը: