Բելգիայում «հոլիվուդյան սցենարով» բանկ թալանելու կասկածանքով վրացու են ձերբակալել

Բելգիայի ոստիկանությունը վրացական ծագումով 27-ամյա տղամարդու է ձերբակալել, որը կասկածվում է փետրվարի 2-ին աշխարհում ալմաստի վաճառքի ամենախոշոր կենտրոն հանդիսացող Անտվերպենի BNP Paribas Fortis բանկի մասնաճյուղում կողոպուտ իրականացնելու համար: Այս մասին РИА Новости-ին հայտնել են ոստիկանության քաղաքային կոմիսարիատից:

Գործակալության զրուցակիցը հայտնել է, որ տղամարդը գործել է «հոլիվուդյան սցենարով»: Ամեն ինչ այնքան աննկատ է արվել, որ ո՛չ պահակները, ո՛չ տեղի բնակիչները ոչինչ չեն կասկածել:

Տեղի լրատվամիջոցների փոխանցմամբ՝ նա և իր հանցակիցներն իրենց հետ վերցրել են բանկում պահվող մոտ 1000 տուփերից 20-30-ը, որոնց մեջ, ամենայն հավանականությամբ, ադամանդ և թանկարժեք զարդեր են եղել:

Բանկն արդեն խնդրել է իր հաճախորդներին բացահայտել գողացված տուփերի պարունակությունը, իսկ ովքեր հրաժարվեն դա անելուց, կարող են զրկվել ապահովագրական վճարներից: