«Պահանջում ենք ազատ արձակել մեր հերոսին». Ցույց Ստեփանակերտում՝ ընդդեմ Ռոբերտ Քոչարյանի կալանավորման

Արցախի Հանրապետության մայրաքաղաք Ստեփանակերտում՝ Ազնավուրի հրապարակում, բողոքի ցույց էր տեղի ունենում «Ազատություն Քոչարյանին» խորագրով, որը կազմակերպել էր «Ռոբերտ Քոչարյանի աջակիցների միությունը»: Ակցիայի մասնակիցները պահանջում էին ՀՀ եւ ԼՂՀ նախկին նախագահ Ռոբերտ Քոչարյանին ազատ արձակել: Ակցիայի ժամանակ ելույթով հանդես եկավ ԱՀ «Մեսրոպ Մաշտոց» շքանշանի ասպետ, ֆիզիկոս Գրիգորի Աֆանասյանը: Այս մասին տեղեկացնում է yerevan.today-ը:

«Այսօր գրեթե 30 տարի անց մենք կրկին հավաքվել ենք, եւ հավաքվել ենք Հայաստանի Հանրապետության եւ Արցախի Հանրապետության նախագահ Ռոբերտ Քոչարյանին պաշտպանելու համար: Ղարաբաղցիները իրենց ղեկավարներին չեն գցում: Միշտ ցույցերի ժամանակ Ռոբերտ Քոչարյանը կանգնել էր մեր կողքին եւ ելույթ էր ունենում, իսկ հիմա մենք պահանջում ենք անհապաղ նրա ազատ արձակումը: Սա Արցախի ձայնն է եւ այն պետք է լսելի լինի»,- ասաց Գրիգորի Աֆանասյանը

«30 տարի առաջ մենք հաղթեցինք, որովհետեւ մենք եղանք միասնական, իսկ Ռոբերտ Քոչարյանն այն ժամանակ ընդամենը 33 տարեկան էր: Նա չվախեցավ մեծ պատասխանատվությունից եւ այդ բեռը վերցրեց իր վրա: Ճիշտ է՝ իր կողքին կային մեծ եւ պատասխանատու մարդիկ, բայց այդ տարիքում վերցնել պատասխանատվությունը, նշանակում է ունենալ տղամարդկություն, կամքի ուժ եւ սեր ժողովրդի նկատմամբ: Այդ ժամանակ մեզնից ոչ ոք չգիտեր, որ 30 տարի հետո մենք հավաքվելու ենք հրապարակում եւ պահանջելու ենք ազատություն մեր հերոսին, Արցախի հերոսին: Նա մեր հերոսն է»,- ելույթում ասաց ակցիայի մասնակից Վերա Խաչատրյանը:

«Այսօր մենք ապրում ենք շատ մեծ ցավ: Այստեղ երկար տարիներ ղեկավարել է Ռոբերտ Սեդրակովիչ Քոչարյանը: Նա երիտասարդ տարիքում ինչ պաշտոն էլ որ զբաղեցրել է, պատվով է կատարել՝ սկսած արցախյան շարժումից, այն օրերից, երբ մարդիկ հավաքվել եւ միասնական Հայաստան են կանչել: Հայաստանից են նրան կանչել, որ Հայաստանում նա ղեկավարի եւ այսօր նա մեր շարքերում չէ: Ես խնդրում եմ անհապաղ ազատել այդ մարդուն, քանի որ թուրքը մի քանի քայլ այն կողմից տեսնում է եւ ուրախանում, որ իր ազգն է իր հերոսին դատապարտում: Ես խնդրում եմ եկեք մինչեւ վերջ կանգնենք եւ մեր պայքարը շարունակենք»,- ասաց ակցիայի մասնակից Ալեքսանդր Հայրապետյանը:

Ակցիայի մասնակիցներից մեկն ասաց, որ եթե հարկ լինի անգամ ոտքով Ստեփանակերտից կարող են հասնել Երեւան, այդտեղ էլ ցույցեր անել, որպեսզի ազատենք Ռոբերտ Քոչարյանին:

Լուրեր Հայաստանից - NEWS.am