Ալավերդու պղնձաձուլական գործարանի վերջնական լուծումը կլինի փակումը. Վարագ Սիսեռյան

Ալավերդու պղնձաձուլական գործարանի աշխատակիցները նոյեմբերի 3–ին հանդիպել են փոխվարչապետի պաշտոնակատար Տիգրան Ավինյանի գրասենյակի ղեկավար Վարագ Սիսեռյանի եւ վարչապետի պաշտոնակատար Նիկոլ Փաշինյանի օգնական Արեն Մկրտչյանի հետ։

Tert.am-ի հետ զրույցում Վարագ Սիսեռյանը նշեց, որ գործարանի աշխատակիցների հետ հանդիպմանը խոսել են ժամանակավորապես վերագործարկման մասին, որպեսզի 630 աշխատակիցները հնարավորություն ունենան շարունակել աշխատանքը:

«Որպեսզի վերջնական որոշումը կայացվի, հիմնականում մնացել է ՎՏԲ-ի հարցը: Որպես միջնորդ ենք հանդես գալիս: Բանակցությունները հասան նրան, որ բանկից պահանջեցինք պաշտոնական թուղթ, որի մեջ գրված են իրենց առաջարկները՝ գրավների հետ կապված: Մենք ասել ենք, որ այդ թուղթը մեզ տրամադրեն երկուշաբթի օրը, այն տրամադրել են երեկ՝ ժամը 11 –ի կողմերը»,- շեշտեց նա:

Վարագ Սիսեռյանն ասաց, որ կա՛մ պետք է կողմերին սեղանի շուրջ հավաքեն, կա՛մ որպես միջնորդ պետք է մեսիջները փոխանցեն:

Վարագ Սիսեռյանը շեշտեց, որ նոր պղնձաձուլարան կառուցելու ծրագրի կյանքի կոչումը և դրանից անմիջապես հետո հին պղնձաձուլարանի աշխատանքի վերջնական դադարեցումը կլինի այս հարցի ընդունելի, ճիշտ և վերջնական լուծումը։

«Փոխվարչապետի կողմից ստեղծված աշխատանքային խմբի շրջանակներում շարունակելու ենք աջակցել «Արմենիան Քափըր Փրոգրամ» ՓԲԸ-ին՝ նոր պղնձաձուլարանի կառուցման ծրագիրը կյանքի կոչելու համար: Հիշեցնեմ, որ կառուցվելիք պղնձաձուլարանի արտանետումների քանակը՝ համեմատած հին/գործող պղնձաձուլարանի արտանետումների, կրճատվելու է մոտ 95%-ով»,- եզրափակեց նա: