«Մահացել է Ֆրանսիայի Ֆրենկ Սինատրան». միջազգային լրատվամիջոցների արձագանքն Ազնավուրի մահվանը

Հոկտեմբերի 1-ին կյանքից հեռացել է աշխարհահռչակ ֆրանսահայ շանսոնյե Շառլ Ազնավուրը. նա 94 տարեկան էր:

Բրիտանական հեղինակավոր The Guardian պարբերականը նշել է, որ մահացել է «Ֆրանսիայի Ֆրենկ Սինատրան»՝ ի ծնե Շահնուր Վաղինակ Ազնավուրյանը, որն աշխարհին հայտնի էր որպես Շառլ Ազնավուր:

Մինչդեռ BBC-ն գրում է, որ «Ցեղասպանությունից մազապուրծ եղած հայ գաղթականների ընտանիքում ծնված Ազնավուրն ամբողջ աշխարհում վաճառել է ավելի քան 180 մլն ձայնասկավառակ, նկարահանվել է մոտ 60 ֆիլմում»:

«Նա առավելապես հայտնի է She հիթով, իսկ 2017թ. նրա անվանական աստղն է բացվել Հոլիվուդի Փառքի ծառուղում: 1998թ. CNN հեռուստաալիքը նրան ճանաչել է դարի լավագույն էստրադային երգիչ»,-գրում է BBC-ն՝ նկատելով, որ Ազնավուրն իր երգերում պատմում է՝ ինչ ասել է ապրել որպես մեծ կորուստ կրած գաղթական:

 Ազնավուրը ձայնագրել է 1200-ից ավելի երգ՝ յոթ տարբեր լեզվով, ինչպես նաև ելույթ է ունեցել աշխարհի 94 երկրում:

Al Arabiya-ն նշում է, որ 94-ամյա Ազնավուրը մահկանացուն կնքել է իր տանը: Նա նոր էր վերադարձել Ճապոնիայից, որտեղ մեկնել էր համերգային շրջագայության:

Բրիտանական The Sun-ը նշում է, որ Ֆրանսիայի նախագահ Էմանուել Մակրոնն Ազնավուրի մեծ երկրպագուն է ու տարբեր առիթների ժամանակ մշտապես երգել է նրա երգերը:

«Ընդամենը 1 մ 60 սմ հասակով այս մարդն աներևակայելի սրտակեր էր»,-գրում է աղբյուրը: 

Ազնավուրն ավելի վաղ պատմել էր իր ստեղծագործական պլանների մասին և վստահություն հայտնել, որ իր 100-ամյակը կնշի բեմի վրա։

«Ես ծրագրում եմ համերգ 2024 թվականի մայիսի 22-ին՝ ծննդյանս 100-ամյակին։ Հետո տեսնենք»,- ասել էր նա՝ հավելելով, որ մտադիր չէ «մեռնել տանը՝ բազկաթոռին նստած»։

Հայտնի է, որ լեգենդար շանսոնյեն մահացել է լոգարանում՝ սրտի կանգի պատճառով: Այլ տեղեկություններ չեն հաղորդվում:

Շառլ Ազնավուրը ծնվել է 1924 թվականի մայիսի 22-ին Փարիզի Սեն Ժերմեն դե Պրե թաղամասում, հայ գաղթականներ Միշա և Քնար Ազնավուրյանների ընտանիքում, ծննդյան անունը՝ Շահնուր Վաղինակ Ազնավուրյան: Ազնավուրի հայրը ծնվել է Ախալցխայում, արմատներով Էրզրումից էր, իսկ մայրը՝ Քնար Բաղդասարյանը, Իզմիրից էր, Հայոց ցեղասպանության ականատես փրկվածներից:

Այս թեմայով «Երկու լեգենդ». Ազնավուրի դուստրը հրապարակել է շանսոնյեի և նախօրեին կյանքից հեռացած լեգենդար դերասան Քըրք Դուգլասի լուսանկարը «Դու կարող ես մերսել, ինչպես քեզ սովորեցրել եմ». ինչպես է փոքրիկ Ռաֆիկը մերսում Ազնավուրին Շառլ Ազնավուրի դուստրն ընտանիքի առօրյայից տեսանյութ է հրապարակել (տեսանյութ) Նրա ձայնը որևէ մեկի հետ չես շփոթի. ռուսական «Առաջին ալիքի» անդրադարձը Շառլ Ազնավուրի կյանքին ու գործունեությանը Կոչ եմ անում բոլորին այստեղ գալ ոչ միայն Ցեղասպանության օրը, կոչ եմ անում Հայաստանը դարձնել ավելի բարգավաճ. Նիկոլա Ազնավուր