Լավրովը հայկական արմատներ ունի, բայց, ինչպես և Ստալինը, ծնվել է Վրաստանում. Ֆրանսիական պարբերականի հոդվածը

Ֆրանսիական Le Figaro թերթը հոդված է հրապարակել Ռուսաստանի Դաշնության արտգործնախարարության պաշտոնական ներկայացուցիչ Մարիա Զախարովայի մասին՝ նրան անվանելով Սերգեյ Լավրովից հետո Ռուսաստանում ամենաազդեցիկ դիվանագետը:

«Առաջին պլանում, իհարկե, Սերգեյ Լավրովն է՝ ռուսական դիվանագիտության դեմքը, որը հայտնի է ամբողջ աշխարհում արդեն մոտ 15 տարի: Այս ճկուն մտքով մարդը ծնվել է Վրաստանում, ինչպես և Ստալինը, սակայն ունի հայկական արմատներ: Շատերը համաձայն են, որ նա կմնա պատմության մեջ որպես երկրի մեծագույն արտգործնախարարներից մեկը՝ հաշվի առնելով ցարական ժամանակներն ու ԽՍՀՄ շրջանը: Ինչ էլ որ լինի, նրա կողքին մենք տեսնում ենք 42-ամյա Մարիա Զախարովային՝ ԱԳՆ-ի պաշտոնական ներկայացուցչին: Նա ՌԴ նախագահ Վլադիմիր Պուտինի արտաքին քաղաքականության մեկ այլ դեմքն է»,- գրում է Le Figaro-ն: 

Հոդվածը նաև պատմում է Մարիա Զախարովայի և նրա ղեկավար Սերգեյ Լավրովի փոխհարաբերությունների մասին:

Ինքը՝ Մարիա Զախարովան, ֆրանսիական թերթին տված հարցազրույցում նշել է, որ Սերգեյ Լավրովի հետ միանման են մտածում և միանման եզրակացություններ անում, միակ տարբերությունն այն է, որ Ռուսաստանի արտգործնախարարը ծխախոտ է ծխում, իսկ նա սիգար է նախընտրում:

Նշենք, որ ռուսական աղբյուրներում նշվում է, որ Լավրովը ծնվել է ոչ թե Վրաստանում, այլ Մոսկվայում: