Ահաբեկչության ընթացքում Իրանում 24 մարդ է մահացել

Ահվազ իրանական քաղաքում այսօր տեղի ունեցած ահաբեկչական գործողության ընթացքում զոհվել է 24 եւ վիրավորվել 50 հոգի: Ահաբեկչությունը տեղի է ունեցել ռազմական շքերթի ժամանակ:

Զոհերի եւ վիրավորների թվում կան նաեւ երեխաներ: Հաղորդվում է նաեւ, որ վիրավորներից շատերի վիճակը ծանր է:

Խուզեստանի փոխնահանգապետը հայտնել է, որ ահաբեկչությունն իրականացրել է չորս ահաբեկիչ, որոնք թաքնված են եղել բեմի հետնամասում: Ականատեսների վկայությամբ կրակոցները շարունակվել են մոտ տասը րոպե: 

Լրատվամիջոցների մի մասը հայտնում է, որ ահաբեկիչներից երկուսը սպանվել է, իսկ երկուսն էլ ձերբակալվել, իսկ այլոք շեշտում են, որ սպանվել են բոլոր չորս հարձակվողները:

Ահաբեկչության պատասխանատվությունն իր վրա է վերցրել Սաուդյան Արաբիայի հետ սերտ կապեր ունեցող մի խմբավորում «Ահվազի հայրենասիրական դեմոկրատական արաբական շարժում» անվանումով:

Իրանի ԱԳ նախարար Մոհամադ Ջավադ Զարիֆը ահաբեկչության համար մեղադրել է ահաբեկչության տարածաշրջանային հովանավորներին եւ նրանց ամերիկյան տերերին: 

Այս օրերին Իրանում նշում են իրան-իրաքյան պատերազմի հերթական տարելիցը:

Top-News.am