Թուրք գրողը բանտում Հայոց ցեղասպանության մասին գիրք է գրում

Թուրք գրող Ահմետ Ալթանը, որին փետրվարին ձերբակալել են 2016 թվականի հեղաշրջման փորձին մասնակցելու մեղադրանքով, շարունակում է աշխատել իր «Օսմանյան քառյակ» վիպաշարի ստեղծման վրա, որի 4-րդ՝ եզրափակիչ անվերնագիր հատորը նվիրված է Հայոց ցեղասպանության նկարագրությանը, հայտնում է Publisher Weekly-ն:

«Օսմանյան քառյակ»-ի վերջին հատորը նվիրված է 1915 թվականին եւ պատմում է «Գալիպոլիի մարտի եւ Հայոց ցեղասպանության պատմությունները»: Վիպաշարը հեղինակը սկսել է գրել 1998 թվականից՝ հրատարակելով «Ինչպես սրի հասցրած վերքը» հատորը, եւ ի սկզբանե նպատակադրված է եղել, որ երկար պետք է տեւի, քանի որ նման ստեղծագործությունները լուրջ եւ խորը ուսումնասիրություն են պահանջում:

Ալթանն արդեն իսկ հայտնի է ցեղասպանության մասին հրապարակային ելույթներով, մինչդեռ այս թեման արգելված է Թուրքիայում, եւ դրա մասին խոսողները կարող են հայտնվել բանտում՝ Թուրքիային վիրավորանք հասցնելու մեղադրանքով: Հարցին՝ ինչո՞ւ է անհրաժեշտ համարել ցեղասպանությանն անդրադառնալ գեղարվեստական գրականության մեջ, գրողը պատասխանել է. «Կարծում եմ, որ պատմության մութ եւ արյունոտ կողմի լավագույն նկարագիրը կարելի է գտնել գրականության մեջ: Գրականությունը ոչ միայն իրականությունն է հայտնում, այլեւ մեզ թույլ է տալիս զգացմունքային կապ ստեղծել նրա հետ, ինչ կատարվել է պատմության մեջ, ներքուստ զգալ անցյալի դեպքերի թողած հետքերը: Կարդալով մի կնոջ զգացումների մասին, ով տեսնում է, թե ինչպես են սպանում իր երեխային, ավելի ամբողջական զգացումներ է տալիս մարդուն, քան փաստական պնդումը, որ 1 միլիոն մարդ է սպանվել: Այդ կերպ ավելի լավ ես հասկանում ամբողջ իրականությունը»:

Նրա խոսքով՝ պարզ չէ, թե ինչ կլինի իր հետ. կարող է ազատ արձակվել կամ բանտում մահանալ: «Կարեւոր է, թե որտեղ է մարդն անցկացնում իր ժամանակը, բայց նաեւ կարեւոր է, թե ինչպես: Ես բանտում եմ, սակայն ես երազում եմ, մտածում եւ գրում: Ես աշխատում եմ եւ կարող եմ իմ ձայնը լսելի դարձնել ամբողջ աշխարհում: Ուստի այն, թե ես երբ ազատ կարձակվեմ բանտից, այդքան էլ հրատապ չէ»,- ասել է վիպասանը:

Այս թեմայով Թուրքիայում 5,5 մագնիտուդ ուժգնությամբ երկրաշարժ է տեղի ունեցել Թուրքիա–Հունաստան սահմանին զինված բախում է տեղի ունեցել Թուրքիայի ընդդիմադիր կուսակցապետի նկատմամբ հետաքննություն է սկսվել Թուրքիայում 5․8 մագնիտուդ ուժգնությամբ երկրաշարժ է տեղի ունեցել․ կա 1 զnh և 69 տուժած Զբոսաշրջիկները չեղարկում են դեպի Թուրքիա տուրերը՝ հնարավոր երկրաշարժերի պատճառով