Աստղագետները երեք երկրանման մոլորակներով համակարգ են հայտնաբերել

Իսպանիայում աստղագետները, վերլուծելով «Կեպլեր» աստղադիտակի տվյալները, երկու նոր մոլորակային համակարգ եւ երեք երկրանման մոլորակ են հայտնաբերել, հայտնում է «ՌԻԱ Նովոստի»-ն՝ վկայակոչելով Monthly Notices of the Royal Astronomical Society ամսագրում հրապարակված հոդվածը:

Առաջին համակարգն Արեւից հեռու է մոտ 160 լուսային տարով: Այն առնվազն երեք քարե մոլորակ է պարունակում, որոնց շառավիղը հավասար է կամ գրեթե հավասար է երկրայինին, իսկ զանգվածը կազմում է Երկրի զանգվածի 1.4-ը, 0.9-ը եւ 1.3-ը: Երկնային մարմինները կարմիր թզուկի շուրջ պտտվում են 5.2, 7.8 եւ 10.1 օրվա ընթացքում: Աստղի արդյունավետ ջերմաստիճանը 3450 կալվին է, ինչը գրեթե մեկուկես անգամ քիչ է, քան Արեւինը:

Երկրորդ համակարգում գլխավոր աստղը կարմիր թզուկն է՝ 3800 կալվին արդյունավետ ջերմաստիճանով: Դրա շուրջը երկու գերերկիր է պտվում, որոնք իրենց չափսերով երկու անգամ գերազանցում են Երկիր մոլորակին, իսկ քաշով՝ հինգ անգամ: Մոլորակներն Արեւի շուրջ մեկ պտույտը կատարում են 6 եւ 12 օրվա ընթացքում:

Հետագայում գիտնականները հույս ունեն բնութագրել օբյեկտների մթնոլորտը, ինչպես նաեւ որոշել դրանց բաղադրությունը: Սակայն աստղագետները ենթադրում են, որ մոլորակները չափազանց տաք են՝ դրանց վրա կյանքի հայտնի ձեւերի գոյության համար: