Եթե կողմերն ինչ-որ փուլում համաձայնեն, որ ԼՂ–ը վերադառնա բանակցային սեղան, ապա դա իրենց որոշումը կլինի, և մենք պետք է հարգենք դա. Լավրով

Ռուսական դիրքորոշումը ղարաբաղյան հիմնախնդրի կարգավորման հարցում մնում է անփոփոխ․ Մոսկվայում ՀՀ արտգործնախարար Զոհրաբ Մնացականյանի հետ բանակցություններից հետո համատեղ մամուլի ասուլիսում այս մասին հայտարարեց Ռուսաստանի Դաշնության արտգործնախարար Սերգեյ Լավրովը:

Նա նման դիտարկում արեց՝ պատասխանելով ռուսական լրատվամիջոցների մեկի լրագրողի դիտարկմանը, թե ՀՀ վարչապետ Նիկոլ Փաշինյանն արել է «ռեզոնանսային հայտարարություն»՝ Արցախը բանակցային սեղան վերադարձնելու մասին, և ԵԱՀԿ Մինսկի խմբի համանախագահներն էլ, մասնավորապես, ՌԴ-ն ներկայացնող Ալեքսանդր Պոպովը ժամանակին հայտարարել էր, որ որոշակի մի փուլում Լեռնային Ղարաբաղը պետք է վերադառնա բանակցային սեղան: Լրագրողը նաև հետաքրքրվել է Լավրովից, թե արդյոք մո՞տ է այդ «որոշակի ժամանակահատվածը»:

«Ռուսաստանը կողմ է, որ ղարաբաղյան հիմնախնդիրը լուծվի ԵԱՀԿ Մինսկի խմբի համանախագահների միջոցով, հիմնախնդրի, որի կողմերից են, ինչպես Ադրբեջանը և այլ երկրներ, այնպես էլ Հայաստանը:

Մենք վստահ ենք, որ դա օպտիմալ ձևաչափ է: Եվ մենք՝ որպես ԵԱՀԿ Մինսկի խումբը համանախագահող երկիր, մեր գործընկերների՝ Ֆրանսիայի, ԱՄՆ-ի հետ, տանում ենք ընդհանուր շահերի, առանց հակասությունների մի գիծ, որը հնարավորություն կստեղծի Բաքվի և Երևանի միջև պայմանավորվածություններ ձեռք բերելու համար: Դա տարիներ շարունակ արվել է»,- ասաց նա:

Սերգեյ Լավրովը հիշատակեց, որ եղել են ժամանակներ, երբ Լեռնային Ղարաբաղը մասնակցել է բանակցություններին, հետո է ձևաչափը փոխվել: Նա նաև ուղղեց իրեն հարց տվող լրագրողին՝ նշելով, որ Պոպովը չի հայտարարել, որ Արցախը «պետք է» վերադառնա:

«Նա ասել է, որ եթե կողմերն ինչ-որ փուլում համաձայնեն, որ Լեռնային Ղարաբաղը վերադառնա բանակցային սեղան, ապա դա իրենց որոշումը կլինի, և մենք պետք է հարգենք դա»,- ասաց նա: