Կամո Հովհաննիսյան․ Հաղթեցինք արժանի խաղով

Ֆուտբոլի Ղազախստանի առաջնության 10-րդ տուրում «Օրդաբասիին» հաղթելուց հետո (4:2), «Ժետիսուի» և Հայաստանի հավաքականի կիսապաշտպան Կամո Հավհաննիսյանը ներկայացրել է տպավորությունները։

«Շատ լավ տպավորություններ են, քանի որ հաղթեցինք արժանի խաղով։ Գիտենք, որ Միլան Բոյովիչը լավ է իրացնում գոլային պահերը, դրա համար փորձում ենք տուգանային հրապարակում գտնել նրան։ Միտումնավոր չենք անում, ուղղակի նա հայտնվում է ճիշտ տեղում՝ դառնալով գոլի հեղինակ։ Միշտ խաղում ենք հաղթանակի համար։ Վերլուծել էինք մրցակցի խաղը, գիտեինք թե՛ ուժեղ, թե՛ թույլ կողմերը։ Մրցակիցը ակտիվ սկսեց, բայց մենք հավասարեցրինք խաղը և նախաձեռնությունը անցավ մեզ։ «Օրդաբասիին» արագ և տեխնիկապես զարգացած կիսապաշտպաններ ու հարձակվողներ ունի։ Մասամբ կարողացանք նրանց «վնասազերծել». ինչո՞ւ մասամբ, քանի որ կարողացան 2 գոլ խփել»,- Հովհաննիսյանի խոսքն է փոխանցում ակումբի պաշտոնական կայքը։

Հայաստանի հավաքականի կիսապաշտպան Կամո Հովհաննիսյանը «Ժետիսուի» մեկնարկային կազմում հանդես է եկել 76 րոպե եւ դարձել 2 գոլային փոխանցման հեղինակ: Հովհաննիսյանը վաստակել է նաեւ 11 մետրանոց հարված, իսկ 76-րդ րոպեին նրան փոխարինել է Հայաստանի հավաքականի կիսապաշտպան Էդգար Մալաքյանը։

Հիշեցնենք, որ Կամո Հովհաննիսյանը հրավիրվել է Հայաստանի ազգային հավաքական՝ մասնակցելու Մալթայի (մայիսի 29) եւ Մոլդովայի (հունիսի 4) դեմ Ավստրիայում կայանալիք ընկերական խաղերին: