Հենրիխ Մխիթարյանը պատրաստվում է «Մանչեսթեր Յունայթեդի» դեմ խաղին

Հայաստանի հավաքականի ֆուտբոլիստ Հենրիխ Մխիթարյանը պատրաստվում է Անգլիայի առաջնության 36-րդ տուրի խաղին:

Ինչպես նշում է dailymail.co.uk կայքը, հայազգի ֆուտբոլիստը «Արսենալի» կազմում մեկնել է Մանչեսթեր, որտեղ այսօր լոնդոնցիները հանդիպելու են տեղի «Մանչեսթեր Յունայթեդի» հետ: Սա Հենրիխ Մխիթարյանի առաջին հանդիպումն է իր նախկին ակումբի եւ մարզչի դեմ:

Խաղն առաջին հերթին մեծ հետաքրքրություն է առաջացրել այն պատճառով, որ իրար հետ կրկին մրցելու են թշնամաբար տրամադրված մասնագետներ: «Արսենալի» գլխավոր մարզիչ Արսեն Վենգերի եւ «Մանչեսթեր Յունայթեդի» նրա գործընկեր Ժոզե Մոուրինյոյի միչեւ «սեւ կատու» առաջին անգամ անցել է դեռեւս 2004 թվականին, երբ պորտուգալացի մասնագետը գալով Լոնդոնի «Չելսի», մեկ տարի հետ ֆրանսիացուց խլեց չեմպիոնի տիտղոսը: Անցած 14 տարվա ընթացքում նրանք Անգլիայի առաջնություններում հանդիպել են 18 անգամ: Այդ խաղերում Արսեն Վենգերը տարել է ընդամենը 2 հաղթանակ՝ կրելով 9 պարտություն:

«Մանչեսթեր Յունայթեդ» – «Արսենալ» սկզբունքային խաղը կմեկնարկի Երեւանի ժամանակով ժամը 19:30-ին: