Անկարայում բազմաթիվ քաղաքացիներ են ձերբակալվել

Թուրքիայի մայրաքաղաք Անկարայում ոստիկանությունը լայնամասշտաբ գործողություն է ձեռնարկել մի շարք հասցեներով՝ ձերբակալելով օրերս սոցցանցերում հակապետական գրառումներ արած մի շարք անձանց:

Ինչպես գրում է թուրքական «Էվրենսել» պարբերականը, ձերբակալվածներին մեղադրանք է առաջադրվել ահաբեկչական կազմակերպության հարելու կամ աջակցելու համար: Ոստիկանությունը պնդում է, որ վերջիններս կապ ունեն «Քրդստանի աշխատավորական կուսակցություն» խմբավորման հետ:

Ձերբակալվածների հստակ թիվը չի նշվում:

Հայտնի է, որ նրանց թվում կա ընդդիմադիր «Էմեք» կուսակցության բարձրաստիճան 5 անդամ:

Հիշեցնենք, որ ՔԱԿ-ը քրդական կազմակերպություն է, որի հիմնական նպատակն է զինված պայքարի միջոցով Թուրքիայի հարավ-արևելյան, Իրաքի հյուսիսային, Իրանի հյուսիս-արևմտյան և Սիրիայի հյուսիս-արևելյան տարածքներում հիմնել քրդական անկախ պետություն:

Թուրք-քրդական հարաբերությունների սրման հերթական փուլը սկսվել է 2015-ի ամռանը:

Կազմակերպությունը 1978 թվականին հիմնադրել է Աբդուլլահ Օջալանը: