«Գանձասարը» մրցավարին համոզեց չեղարկել 11-մետրանոցը. զավեշտալի դեպք (տեսանյութ)

Հետաքրքիր դեպք գրանցվեց Հայաստանի գավաթի խաղարկության կիսաեզրափակչի «Գանձասար Կապան»-«Շիրակ» խաղի ընթացքում: Այսօր՝ մարտի 7-ին, կայացած հանդիպման 31-րդ րոպեին «Գանձասարի» խաղացողները տուգանային հրապարակում գցեցին մրցակցի խաղացող Արամ Մուրադյանին: Այդ ժամանակ 1:0 հաշվով առջեւում էր «Գանձասարը»: Գլխավոր մրցավար Սուրեն Բալիյանը 11-մետրանոց նշանակեց, սակայն մինչեւ շիրակցիները պատրասվում էին իրացնել այն, մրցավարը 11-մետրանոցը փոխարինվեց անկյունայինով (տեսանյութում՝ 42 րոպե 30 վայրկյանից): Տեսագրությունից կարող է տպավորություն ստեղծվել, որ «Գանձասարի» ֆուտբոլիստները ճնշում են գործադրում մրցավարի վրա:

Մրցավարների կողմից կայացված որոշումները ոչ թե օգնականների, այլ ֆուտբոլիստների ճնշման տակ փոխելը ընդունված չէ անգամ եթե նրանք սխալ են:

Այսօրվա հանդիպումն ավարտվեց 1:1 հաշվով: 23-րդ րոպեին «Գանձասարից» հաշիվը բացել էր Արա Խաչատրյանը: 42-րդ րոպեին էլ գյումրեցիների կազմում պատասխան գնդակը խփել էր Մուսա Բակայոկոն:

Խաղը կայացավ Գյումրիի «Քաղաքային» մարզադաշտում, սակայն տանտիրոջ կարգավիճակում «Գանձասարն» էր: Պատասխան հանդիպումը կկայանա ապրիլի 18-ին, որտեղ տանտերը կլինի «Շիրակը»:

armtimes.com