Զիդան. Չգիտեմ, թե ինչու էին Ռեալի երկրպագուները նորից սուլում Բենզեմային

«Ռեալի» գլխավոր մարզիչ Զինեդին Զիդանը մեկնաբանել է Իսպանիայի առաջնության հերթական տուրում «Ռեալ Սոսյեդադի» նկատմամբ տոնած հաղթանակը.

 «Ամենակարևորն այն է, որ մենք հենց սկզբից շատ լավ էինք խաղում: Առաջին կեսը շատ վճռական և ինտենսիվ անցկացրինք:

 Որոշ բաներ կան, որ պետք է շտկենք պաշտպանությունում, բայց ես կնշեմ դրական պահերը` 5 գոլն ու խաղի սկիզբը մեր կատարմամբ: Երկրպագուները նորից սուլու՞մ էին Բենզեմային. ես չգիտեմ, թե ինչու է դա տեղի ունենում, բայց նրանք կարող են անել այն, ինչ ցանկանան: Կարիմը ունեցավ պահեր, իսկ հաջորդ խաղում հաջողությունը կարող է թեքվել նրա կողմը: Նա շատ էր վազում:

ՊՍԺ-ի հետ Չեմպիոնների լիգայի առաջիկա խա՞ղը. Ես գիտեմ, թե ով կխաղա առաջին րոպեներից: Մենք պատրաստ ենք այդ խաղին, դա է ամենակարևորը»,- Զիդանի խոսքերն է փոխանցում «Football Espana»-ն:

Հիշեցնենք` «Ռեալը» 5-2 հաշվով հաղթել է «Ռեալ Սոսյեդադին», ինչի շնորհիվ Զիդանի գլխավորած թիմը վաստակել է 42 միավոր՝ վերադառնալով 3-րդ հորիզոնական: