Անկարայում Ռուսաստանի և Իրանի դեսպանները կանչվել են Թուրքիայի ԱԳՆ

Անկարայում Ռուսաստանի և Իրանի դեսպանները կանչվել են Թուրքիայի արտաքին գործերի նախարարություն՝ կապված Սիրիայի հյուսիսում ստեղծված լարված իրավիճակի հետ, գրում է թուրքական «Հյուրրիյեթ» պարբերականը:

Դեսպաններ Ալեքսեյ Երխովի և Մուհամեդ Իբրահիմ Թահերիան Ֆարդի հետ հանդիպման ժամանակ Թուրքիայի ԱԳՆ ներկայացուցիչը մեղադրել է Սիրիայի կառավարական ուժերին Իդլիբում անվտանգության ռեժիմը խախտելու համար:

«Ասադի ռեժիմի կողմից Իդլիբում անվտանգության գոտու սահմանի խախտման հետ կապված մեր անհանգստությունը մենք փոխանցել ենք Աստանայում անվտանգության ռեժիմի երաշխավորի դերում հանդես եկած Ռուսաստանին և Իրանին՝ ռազմական և դիվանագիտական մակարդակով», - ասված է Թուրքիայի ԱԳՆ-ի տարածած հայտարարության մեջ:

Նշենք, որ Աստանայում Թուրքիայի, Իրանի և Ռուսաստանի միջև ձեռք բերված պայմանավորվածության շրջանակներում Սիրիայում ստեղծված անվտանգության գոտիներն այսօրվա դրությամբ «դե ֆակտո» հրադադարի ռեժիմ են պահպանում 5000 ք/կմ տարածության վրա:

Սիրիայում ստեղծված անվտանգության գոտիներից Իդլիբում Թուրքիան ունի երեք ռազմական դիտորդական կետ, որոնք շարունակում են իրենց գործունեությունը:

Հիշեցնենք, որ նախօրեին Սիրիայի Իդլիբ նահանգի Դարաթ ալ Իզզա շրջանում ականանետային հարձակման է ենթարկվել Թուրքիայի ԶՈՒ-ին պատկանող ռազմական ավտոշարասյունը։