Նշանակալի իրադարձություն է Ադրբեջանով դեպի ՀՀ ապրանքների տարանցման արգելքի վերացումը. Գրիգորյան

«Ադրբեջանի տարածքով Հայաստան ապրանքների տարանցման արգելքի վերացումը կնպաստի ԵԱՏՄ անդամ պետությունների միջև փոխադարձ առևտրի աճին»,-ասել է  է Հայաստանի փոխվարչապետ Մգեր Գրիգորյանը  Եվրասիական միջկառավարական խորհրդի նիստում, որը անցկացվում է Շիմկենտում։

Նա ընդգծել է, որ Հարավային Կովկասի տարածաշրջանում տրանսպորտային-լոգիստիկ ենթակառուցվածքների դիվերսիֆիկացումը կարևոր խթան կստեղծի արտաքին առևտրի համար. «Այս համատեքստում մեզ համար հատկապես նշանակալի իրադարձություն է վերջին շրջանում Ադրբեջանով դեպի Հայաստան ապրանքների տրանսպորտային արգելքների վերացումը, որը բացում է տարածաշրջանի ներուժի լիարժեք բացահայտման հնարավորությունները և նպաստում փոխադարձ առևտրի աճին», - նշել է Գրիգորյանը։

Միևնույն ժամանակ նա փաստել է, որ տնտեսական տատանումների և համաշխարհային առևտրի փոփոխությունների ֆոնին կարևոր է ԵԱՏՄ-ի արտաքին տնտեսական գործունեության կանոնավոր վերլուծության իրականացումը։ Փոխվարչապետի խոսքով՝ համակարգային մոնիտորինգը թույլ կտա ոչ միայն արագորեն բացահայտել առաջացող անհամաչափությունները, այլև մշակել արդյունավետ միջոցներ ներքին շուկայի և տեղական արտադրողների պաշտպանության համար։

Այս համատեքստում նա ընդգծել է ԵԱՏՄ-ի անդամ պետությունների և ԵՏԿ-ի մաքսային ծառայությունների արդյունավետ փոխգործակցությունը հարկաբեռնված ապրանքների հայտարարագրման մոնիտորինգի հարցում, որը ուղղակիորեն ազդում է մաքսային արժեքի և պետական բյուջեի եկամուտների վրա.  «Միևնույն ժամանակ կարևոր է, որ ազգային ռիսկերի կառավարման համակարգերի կիրառման մոտեցումների և կանոնների համասեռացումը հաշվի առնի ԵԱՏՄ-ի անդամ պետությունների ինքնիշխան շահերը», – հավելել է նա։

Մհեր Գրիգորյանը նաև կարևոր է համարել ԵԱՏՄ անդամ երկրների համատեղ գործողությունների ծրագրով ամրագրված սպառողների իրավունքների պաշտպանության համագործակցության մեխանիզմների կատարելագործումը։ Նրա խոսքով՝ ծրագրի իրականացումը ոչ միայն կլինի վստահության կառավարման հիմնական գործիք սպառողի և բիզնեսի միջև, ինչը հատկապես արդիական է էլեկտրոնային առևտրի արագ զարգացման պայմաններում, այլև կնպաստի շուկաների թափանցիկությանը, սպառողների տեղեկացվածության բարձրացմանը և տնտեսական գործունեության մասնակիցների համար հավասար պայմանների ստեղծմանը։