Հայաստանի փորձագիտական կենտրոնը ստացել է հավատարմագրում

«Հայաստանի Հանրապետության փորձագիտական կենտրոն» ՊՈԱԿ-ը 2026 թվականի մարտի 9-ին Հայաստանի Հանրապետության կրթության, գիտության, մշակույթի և սպորտի նախարարության կողմից ստացել է 5 տարվա ժամկետով հավատարմագրում, ըստ որի՝ կենտրոնի մշակութաբանական փորձաքննությունների բաժինը համապատասխանում է Հայաստանի Հանրապետության Կառավարության 2025 թվականի մայիսի 29-ի N 669 որոշմամբ սահմանված չափորոշիչներին և հավատարմագրված է մշակութային արժեքների փորձաքննություն իրականացնելու համար։

Ստացված հավատարմագրումը կարևոր ձեռքբերում է կենտրոնի համար՝ ստեղծելով առավել լայն հնարավորություններ մասնագիտական գործունեության զարգացման, մշակութային արժեքների փորձաքննության արդյունավետ կազմակերպման և ոլորտում կենտրոնի նկատմամբ վստահության ամրապնդման համար։

Մշակութաբանական փորձաքննությունների բաժինը ձևավորվել է ընդամենը երեք տարի առաջ, այն արդեն հաստատել է իր բարձր մասնագիտական կարողությունները։ Կատարված փորձաքննությունները գնահատվել են արժանահավատ ոլորտի մասնագետների և գործընկեր կառույցների կողմից՝ փաստելով ճշգրտությունն ու հիմնավորվածությունը։ Այս նոր ձեռքբերումը կենտրոնին հնարավորություն կտա ընդլայնել ծառայությունների շրջանակն ու ամրապնդել վստահությունը ոլորտում։