Խաղային օրվա գլխավոր իրադարձություններն ու գրանցված արդյունքները

Մարտի 12-ին կայացան ֆուտբոլի Եվրոպա լիգայի 2025/2026 մրցաշրջանի 1/8 եզրափակիչի առաջին հանդիպումները։ Ներկայացնում ենք խաղային օրվա գլխավոր իրադարձություններն ու գրանցված արդյունքները:

«Լիոնը» թվային առավելությունն իրացրեց խաղավերջում 

Իսպանական Վիգոյում «Սելտան» ընդունել էր ֆրանսիական «Լիոնին»: Հանդիպումն ավարտվեց 1:1 հաշվով: Տանտերերի կազմում 25-րդ րոպեին հաշիվը բացեց պաշտպան Խավի Ռուեդան: 55-րդ րոպեին «Սելտայի» հարձակվող Բորխա Իգլեսիասը ստացավ երկրորդ դեղին քարտը և հեռացվեց դաշտից, ինչից հետո նախաձեռնությունն անցավ հյուրերին։ Ֆրանսիական ակումբը կարողացավ խույս տալ պարտությունից միայն հանդիպման վերջնամասում. 87-րդ րոպեին էնդրիկը խփեց պատասխան գնդակը։

«Գենկի» տնային հաղթանակը և չեղարկված գոլը 

Բելգիական «Գենկը» սեփական հարկի տակ նվազագույն հաշվով առավելության հասավ գերմանական «Ֆրայբուրգի» նկատմամբ (1:0)։ Հանդիպման միակ գոլը 24-րդ րոպեին հեղինակեց տանտերերի պաշտպան Զաքարիա Էլ-Ուահդին։ Հատկանշական է, որ դեռևս 8-րդ րոպեին հյուրերի կիսապաշտպան Յոհան Մանզամբիի խփած գոլը չեղարկվել էր VAR-ի միջամտությունից հետո։

Անակնկալ Անգլիայում

Անգլիական «Նոթինգհեմ Ֆորեսթը» տնային՝ «Սիթի Գրաունդ» մարզադաշտում կայացած խաղում զիջեց դանիական «Միդտյուլանդին»: Հյուրերին հաղթանակ պարգևեց հարավկորեացի հարձակվող Չո Գյու Սոնի՝ 81-րդ րոպեին խփած միակ գնդակը (0:1)։

Եվրոպա լիգա, 1/8 եզրափակիչ. առաջին հանդիպումների արդյունքները՝

• «Բոլոնիա» (Իտալիա) – «Ռոմա» (Իտալիա)՝ 1:1
• «Լիլ» (Ֆրանսիա) – «Ասթոն Վիլա» (Անգլիա)՝ 0:1
• «Պանատինայկոս» (Հունաստան) – «Բետիս» (Իսպանիա)՝ 1:0
• «Շտուտգարտ» (Գերմանիա) – «Պորտու» (Պորտուգալիա)՝ 1:2
• «Սելտա» (Իսպանիա) – «Լիոն» (Ֆրանսիա)՝ 1:1
• «Գենկ» (Բելգիա) – «Ֆրայբուրգ» (Գերմանիա)՝ 1:0
• «Ֆերենցվարոշ» (Հունգարիա) – «Բրագա» (Պորտուգալիա)՝ 2:0
• «Նոթինգհեմ Ֆորեսթ» (Անգլիա) – «Միդտյուլանդ» (Դանիա)՝ 0:1

1/8 եզրափակիչի պատասխան հանդիպումները կկայանան մարտի 19-ին։ Եվրոպա լիգայի այս խաղարկության եզրափակիչը տեղի կունենա 2026 թվականի մայիսի 20-ին՝ Ստամբուլի «Բեշիքթաշ» մարզադաշտում։