Փոխգնդապետը մեղադրվում է սերժանտ բուժակի նկատմամբ սեքսուալ բնույթի բռնի գործողություններ կատարելու համար. գործը դատարանում է

Ապրիլի 14-ին Երևանի քրեական դատարանում մակագրվել է քրեական գործ, որով Ն զորամասի հրամանատարի բարոյահոգեբանական ապահովման գծով տեղակալ, փոխգնդապետ Մ.Մ.-ը մեղադրվում է նույն զորամասի բուժկետի դեղատան պետ բուժակ, կին զինծառայող, սերժանտ Ա.Հ.-ի նկատմամբ սեքսուալ բնույթի բռնի գործողություններ կատարելու համար։ Գործը մակագրվել է դատավոր Ջ. Հ.-ին։ Այս մասին Iravaban.net-ը տեղեկանում է Datalex դատական տեղեկատվական համակարգից։

Մ.Մ.-ին մեղադրանք է առաջադրվել այն բանի համար, որ նա՝ հանդիսանալով Ն զորամասի հրամանատարի բարոյահոգեբանական ապահովման գծով տեղակալ, կոչումով՝ փոխգնդապետ, 2025 թվականի հունվարի 12-ին՝ ժամը 11:00-ի սահմաններում, զորամասի ռուժկետում սեքսուալ բնույթի բռնի գործողություններ է կատարել նույն զորամասի բուժկետի դեղատան պետ բուժակ Ա.Հ.-ի նկատմամբ։

Իրավական գնահատականը

Մեղադրանքը առաջադրվել է ՀՀ քրեական օրենսգրքի 198-րդ հոդվածի 2-րդ մասի 6-րդ կետով։

ՀՀ քրեական օրենսգրքի 198-րդ հոդվածի 1-ին մասը սահմանում է պատասխանատվություն սեռական հարաբերության կամ սեքսուալ բնույթի այլ գործողությունների համար, որոնք կատարվել են հանցագործությունից տուժած անձի կամքին հակառակ կամ նրա կամքն անտեսելով՝ բռնություն գործադրելով կամ դա գործադրելու սպառնալիքով կամ հանցագործությունից տուժած անձի անօգնական վիճակն օգտագործելով։

Նույն հոդվածի 2-րդ մասի 6-րդ կետը որակավորող հանգամանք է սահմանում այն դեպքերի համար, երբ արարքը կատարվում է զորամասում կամ ծառայության այլ վայրում՝ զինծառայողի նկատմամբ՝ համապատասխան հիմնարկի կամ հաստատության աշխատակցի կողմից։

Այս հոդվածով նախատեսված պատիժը ազատազրկում է՝ հինգից տասը տարի ժամկետով։

Գործի քննությունը

Քրեական գործը դատարան է ներկայացրել Երևանի կայազորի զինվորական դատախազությունը։ Հանրային մեղադրող է հանդիսանում Տ.Պ.-ը։

Գործի քննությամբ անցկացվել են նախնական դատալսումներ՝ ապրիլի 30-ին և հուլիսի 8-ին, ինչպես նաև հիմնական դատալսումներ՝ օգոստոսի 5-ին, 8-ին և 20-ին, հոկտեմբերի 6-ին, նոյեմբերի 13-ին, – տեղեկացնում է Iravaban.net-ը։

Խափանման միջոցը

Մեղադրյալի նկատմամբ որպես խափանման միջոց կիրառվել է բացակայելու արգելքը։

Ծանուցում. Հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով դատարանի օրինական ուժի մեջ մտած դատավճռով։