Մենք պահանջում ենք, որ ղարաբաղյան հակամարտության կարգավորման շուրջ բանակցությունները կոնկրետ արդյունքներ տան. Մամեդյարով

Ադրբեջանը պահանջում է, որ Լեռնային Ղարաբաղի հակամարտության կարգավորման շուրջ բանակցությունները կոնկրետ արդյունքներ տան: Այդ մասին հայտարարել է Ադրբեջանի արտգործնախարար Էլմար Մամեդյարովը Բրազիլիայի արտգործնախարար Ալոիզիո Նունյես Ֆերեյրայի հետ հանդիպումից հետո կայացած մամուլի ասուլիսի ժամանակ, հաղորդում է ԱՊԱ գործակալությունը:

Ադրբեջանի արտգործնախարարը հայտնել է, որ այսօր երեկոյան մեկնում է Մոսկվա, ինչպես նաև նշել է, որ վաղը կայանալու է համանախագահների հետ հանդիպումը:

Մամեդյարովը հայտնել է նաև, որ Ռուսաստանի արտգործնախարար Սերգեյ Լավրովը այցելելու է Բաքու նոյեմբերի 19-20-ին:

«Հանդիպման օրակարգը հայտնի է: Մենք ցանկանում ենք, որ բանակցությունները չընթանան բանակցությունների համար: Անգամ պահանջում ենք, որ լինեն կոնկրետ արդյունքներ: Նախագահների հանդիպմանը նույնպես նշվել է, որ բանակցությունները պետք է կրեն ինտենսիվ բնույթ: Ես գնում եմ Մոսկվա այդ դիրքորոշմամբ: Ժամանակն է լուծել այս հակամարտությունը»,- ասել է Մամեդյարովը:

Ավելի վաղ Ռուսաստանի արտգործնախարար Սերգեյ Լավրովը տեղեկացրել է, որ մտադիր է հաջորդ շաբաթվա սկզբին այցելել Հայաստան և Ադրբեջան:

«Հաջորդ շաբաթվա հենց սկզբին ծրագրված են իմ այցերը Երևան և Բաքու: Նախ և առաջ, այդ այցելությունները նախատեսված են իրականացնել ՌԴ-ի և համապատասխանաբար Հայաստանի ու Ադրբեջանի հետ դիվանագիտական հարաբերությունների հաստատման 25-ամյակին ընդառաջ», - ասել է ՌԴ նախարարը: