Ոչ մի խրամատ, զինված մարդ սահմանին չպիտի լինի, ինչո՞ւ ականապատենք

«Հրապարակ»-ի զրուցակիցն է ԱԺ «Քաղաքացիական պայմանագիր» խմբակցության անդամ, տավուշցի պատգամավոր, Փաշինյանի քավորի եղբայր Վահե Ղալումյանը։

- Պարոն Ղալումյան, ի՞նչ իրավիճակ է այս պահին Կիրանցում, ի՞նչ գործընթացներ են ընթանում, ժողովրդին ասեք, թե ինչ է անում իշխող ուժը Կիրանցում։

- Որքան գիտեմ` արդեն անցել են մնացած սյուների տեղադրման աշխատանքներին։ 9 սյուն է տեղադրվել, մնում է 3 կամ 4 սյուն։

- Այդ սյուներն անվտանգային ի՞նչ երաշխիքներ են տալիս, կարծում եք, թե սյուները տեսնելով՝ ադրբեջանցիներն առաջ չե՞ն գալու։

- Լեգիտիմությունն է մեր անվտանգությունը։ Միակ երաշխիքը սա է եւ սկսվող համագործակցությունը։

- Մարդիկ ասում են` սյուները տեղադրելուց հետո գոնե ականներ տեղադրեք, որ ադրբեջանցիները չներխուժեն հայկական գյուղեր։

- Մենք ասում ենք՝ խրամատ չպիտի լինի, իրար դեմ կանգնած զինված մարդիկ չպետք է լինեն, պիտի լինեն սահմանապահներ։ Կիրանցը եւ Խրեմլու գյուղն իրարից բաժանվում են մեկ ճանապարհով, ի՞նչն ականապատենք, Կիրա՞նցը, թե՞ Խրեմլուն։ 29 743 ք/կիլոմետր Հայաստանի տարածքի մեջ Խրեմլու չկա, դուք ասում եք՝ տալիս ենք, ի՞նչն ենք տալիս։