Մինչև երեք տարեկան երեխայի խնամքի համար զոհված զինծառայողների ծնողներին աջակցություն կտարամադրվի

ՀՀ գործադիր մարմինն այսօր որոշում կընդունի, որով ՀՀ պաշտպանության մարտական գործողություններին մասնակցելու կամ հակառակորդի հետ շփման գծում մարտական հերթապահության կամ հատուկ առաջադրանք կամ ծառայողական պարտականություններ կատարելու ընթացքում կամ հակառակորդի նախահարձակ գործողության հետևանքով զոհված զինծառայողների ծնողների վերարտադրողական առողջության աջակցման միջոցառման շրջանակներում ծնված երեխաների՝ մինչև 3 տարեկանը խնամքի համար գումար կհատկացնի՝ հաշվի առնելով զոհված զինծառայողների ծնողների բարձր տարիքային խումբը, ինչպես նաև հետծննդյան խնամքի դժվարությունները։

Նախագծի հիմնավորման մեջ ասվում է. «ՀՀ կառավարության որոշմամբ հաստատված՝ ՀՀ պաշտպանության մարտական գործողություններին մասնակցելու կամ հակառակորդի հետ շփման գծում մարտական հերթապահության կամ հատուկ առաջադրանք կամ ծառայողական պարտականություններ կատարելու ընթացքում կամ հակառակորդի նախահարձակ գործողության հետևանքով զոհված զինծառայողների ծնողների վերարտադրողական առողջության աջակցման միջոցառման շրջանակներում 2022 թ.-ից իրականացվում է շահառուների կողմից կատարվող՝ փոխնակ մոր ծառայության և դոնորական ձվաբջջի համար ծախսերի մասնակի փոխհատուցման նշանակումն ու վճարումը:

29.11.2023 թ. դրությամբ դոնորական ձվաբջջի ձեռքբերման ծախսերի համար փոխհատուցում է հատկացվել 37 շահառու անձանց, ինչպես նաև փոխհատուցումը փոխանցվել է համապատասխան բժշկական կազմակերպություններին՝ 114 շահառուի համար, իսկ փոխնակ մոր ծառայություններից օգտվելու համար՝ 16 շահառու անձանց համար։

Որոշման նախագծով առաջարկվում է պետական աջակցություն տրամադրել վերարտադրողականության օժանդակ տեխնոլոգիաների կիրառմամբ բժշկական օգնություն ստացած՝ անհայտ բացակայող կամ մահացած ճանաչված զինծառայողի ծնողին մինչև երեք տարեկան երեխայի խնամքն իր բնակության վայրում չհաշվառված անձի՝ դայակի կամ վճարովի հիմունքներով գործող նախադպրոցական հաստատության միջոցով կազմակերպելու հարցում։ Մասնավորապես, նախատեսվում է շահառուի մինչև երեք տարեկան երեխայի խնամքը կազմակերպելու համար զոհված զինծառայողի ծնողի և Հայաստանի Հանրապետության աշխատանքի և սոցիալական հարցերի նախարարության միասնական սոցիալական ծառայության տարածքային կենտրոնի միջև կնքել աջակցության տրամադրման պայմանագիր։ Պայմանագիրը կնքելուց հետո շահառուն երեխայի խնամքը կազմակերպելու նպատակով պետք է կնքի ծառայությունների մատուցման պայմանագիր շահառուի բնակության վայրում չհաշվառված անձի (այսուհետ` դայակ) կամ վճարովի հիմունքներով գործող նախադպրոցական հաստատության (այսուհետ՝ հաստատություն) հետ։ Պայմանագրի հիման վրա յուրաքանչյուր երեխայի խնամքը դայակի կամ հաստատության միջոցով օրական առնվազն 6 ժամով կազմակերպելու համար շահառուին ամսական կտրվածքով նախատեսվում է վճարել գումար՝ ծառայությունների մատուցման պայմանագրով սահմանված ամսական վարձատրության չափով, բայց ոչ ավելի, քան 104 000 դրամը։ Պետական աջակցությունն առաջարկվում է տրամադրել մինչև երեխայի 3 տարին լրանալը։

Նախագծի ընդունման կապակցությամբ նախատեսվում է ՀՀ 2024 թ․ պետական բյուջեի ծախսերի ավելացում։

Մասնավորապես՝ ՀՀ պետական բյուջեից մոտ 100 շահառուի երեխայի խնամքի կազմակերպման համար յուրաքանչյուր տարվա համար կպահանջվի միջինը 124800000 դրամ գումար (100 x 104000 x 12 = 124 800 000)»։