Հայտնվել են մատիտ բռնող կիսագրագետներ, ու ապշեցնում է, թե դրանք ինչպես են ստացել լիցենզիա. Կամո Արեյան

Երևանի քաղաքապետարանի գործակարգավարական նիստի ժամանակ քաղաքապետի խորհրդական Կամո Արեյանը նկատեց՝ ճարտարապետության և քաղաքաշինության ոլորտում հայտնվել են ուղղակի մատիտ բռնող կիսագրագետներ ու ապշեցնում է, թե դրանք ինչպես են ստացել լիցենզիա:

«Աշխատանքի ամբողջ անորակությունը, բարդությունը գալիս է այս նախագծերի անորակությունից, ուստի մեր խնդրանքն է, որ այդ նախագծերը պարզապես չընդունվեն»,- ասաց Արեյանը:

Նա շեշտեց՝ հաջորդ կարևոր հանգամանք այն է, որ մեր վարչականի ղեկավարներն ու վարչության պետերը պետք է ուղղակի բնության մեջ նախագծողի հետ լինեն տեղում.

«Երբեմն ուղղակի անընդունելի անհամապատասխանություններ են բերում ներկայացնում վարչականի ղեկավարներին նախագծողները, հետո ինքը՝ վարչականի ղեկավարն ավելի ճիշտ է ուղղում այդ նախագիծը, քան նախագծողն է իրականացնում»:

Քաղաքապետ Տիգրան Ավինյանը նշեց, որ իրականում շատ խնդիրներ հենց գալիս են նախագծման փուլից և իրականում ինչքան որակով լինի նախագիծն ի սկզբանե, այդքան հետագա աշխատանքը ավելի հեշտ կլինի:

«5 աշխատակից ունեցող տեխհսկողը մեր 105 ընթացիկ աշխատանքներն է հսկում: Այսինքն պարզ է, որ այդ 5 աշխատակցով մարդը գրասենյակից դուրս չի եկել, ինքը թուղթ է մրել: Հետևապես առաջին հերթին պահանջը մեր նկատմամբ և՛ նախագծային աշխատանքների նկատմամբ տեխնիկական առաջադրանքները վերանայել, և՛ տեխհսկողների նկատմամբ տեխնիկական առաջադրանքները վերանայել: Սա ապրանք չի, սա ծառայություն է»,- ասաց Ավինյանը: